Tlam lơ 19/7, ƀơi sang bruă Jơnum min mơnuih ƀôn sang tơring glông Côn Đảo, Khua mir sir ơi Võ Văn Thưởng bưp ƀô̆ mơta khua mua anom bruă pô pơtruh nao rai ƀing tơhan hơkrŭ Việt Nam ta đưm, ayăt mă krư̆ kơđol, taih amang hăng 76 čô mơnă yua bruă kơđi čar ƀơi Côn Đảo, pơ ala kơ rơbêh 5000 čô khua mua, ling tơhan ngă hơkrŭ ayăt mă krư̆ kơđol, kiăng nao čuă jơmư, juh alum pơtrut pran jua hăng čih pioh boh tơhnal tuh rơyuh pran jua tŭ tơlơi ruă nuă, djai brŭ mơ̆ng lu mơnuih ngă tơhan hơkrŭ, ƀing pơsăn drơi jăn kơ lŏn ia hăng mơnuih ƀôn sang khăp kơ lŏn ia, yua kiăng pơklaih rơngai djuai ania. Ƀơi mông bưp, Ƀing khua mua hơdor glăi amăng hrơi blan tŭ tơlơi tơnap tap gleh glar, samơ̆ tong ten, kjăp pran jua lơ̆m ayăt taih amang ngă sat, kơtư̆ juă đut tơhnal, mông djai hơdip aka ƀu thâo ôh ăt djă bong kjăp tơlơi pơmin bruă hơkrŭ.

Tơdơi kơ lu thun pơwơ̆t glăi pơ Côn Đảo, ƀing mơnă hơđăp yua bruă kơđi čar hơmâo pơdah pran jua hok mơak ƀuh lu tơlơi pơblih phrâo ƀơi anih mơ̆ gơñu ƀuh hrup amăng dơnao apui kơdir lŏn tơnah, anih mơ̆ ĭm boh pơtâo kli, phun kyâo, phun rơ̆k đưm adih đôm jă drah kơtăk ƀing tơhan ngă hơkrŭ tong ten. Pơhiăp amăng mông bưp ƀô̆ mơta, Khua mir sir ơi Võ Văn Thưởng mơ-it hiăp tơña bla hăng tơlơi khăp pơpŭ prong prin laih anun hơdor tơngia dlam hloh hăng ƀing mơnă ayăt mă krư̆ yua bruă kơđi čar ƀơi Côn Đảo; brơi thâo hơdôm thun rơgao ping gah, kơnuk kơna đing nao na nao kơ rơbêh 9 klăk čô mơnuih hơmâo djru pran jua kơ lŏn ia; ăt pơtrut kơtang bruă mă hơdor tơngia tla pran, biă mă ñu pơƀut tơlang tơleh tơhan djai pơsăn drơi jăn kơ lŏn ia, ming pơkra glăi pơsat dor tơhan djai pơsăn drơi jăn kơ lŏn ia kiăng ngă djơ̆ tơlơi pơtô ƀong boh hơdor kơ pô pla mơñum ia hơdor kơ pô klơi.