Khua mir sir ơi Võ Văn Thưởng bơni hơ-ơč kơ yă Claudia Arpa hơmâo ruah ngă Khua git gai pơ ala mơnuih ƀôn sang gơnong dlông dêh čar Áo. Hok mơ-ak nao čuă dêh čar Áo amăng hrơi mông tơlơi rô nao rai dua bơnah glăk pơđĭ kyar klă, Khua mir sir ơi Võ Văn Thưởng pơsit dêh čar Việt Nam lăng yôm bruă hơkrŭ hăng pơđĭ tui tơlơi rô nao rai hăng dêh čar Áo, bơni kơ tơlơi lăng ba, gum djru mơ̆ng Khua mua pơ ala mơnuih ƀôn sang gơnong dlông dêh čar Áo hăng bruă pơđĭ kyar bơwih ƀong huă - mơnuih mơnam laih anun mut hrŏm hăng jar kmar mơ̆ng Việt Nam.

Kiăng pơđĭ tui tơlơi ngă hrŏm hơbit dua ƀirô khua pơ ala mơnuih ƀôn sang, Khua mir sir ơi Võ Văn Thưởng kiăng dua bơnah pơtrut bơkơtuai djŏp gưl, kiăng đăo gơnang nao rai bruă kơđi čar, ngă gêh gal kơ bruă ngă hrŏm dua bơnah, ngă hrŏm kơjăp ƀơi mông jơnum dua ƀirô pơ ala mơnuih ƀôn sang amăng kual hăng ƀơi rŏng lŏn tơnah. Dêh čar Việt Nam amra pơtruh brơi bruă ngă hrŏm kơplah wah Ƀirô khua pơ ala mơnuih ƀôn sang dêh čar Áo hăng Khul pơlir hơbit pơ ala mơnuih ƀôn sang ASEAN.