Klah čun ƀơi mông jơnum, Khua mir sir ơi Võ Văn Thưởng lăi pơtong: Bruă mă pơsir hơdôm hră pơar phat kơđi ba pơdjai mơnuih soh hăng ngă tui bruă ba pơdjai mơnuih soh laih phat kơđi jing sa bruă mă yôm biă mă pơdjơ̆ nao kơ bưng bôt tơlơi hơdip ană mơnuih, kiăng sem lăng tong ten, pơsir hăng pơphun bruă mă hăng tơlơi glăm ba prong, hơmâo tơlơi djơ̆, găl, khăp pap, kơđiăng, tong ten, ngă djơ̆ hăng Phiah phiăn dêh čar hăng tơlơi phiăn pơkă, pơgang ba tơlơi dưi ană mơnuih phat kơđi tơlơi tơl pơdjai drơi khom ngă djơ̆ tơlơi phiăn.

Khua mir sir pơtrun hiăp, pơ anăp anai, djop sang bruă khom ngă djop tơlơi pơkă, ngă tui tơpă djơ̆ hnong bruă mă, tơlơi dưi mơ̆ng pô tui hăng tơlơi phiăn pơkă, pơpha bruă mă tơlơi dưi rơđah rơđong rĭm anom bruă; kơtưn ngă hrŏm, sem lăng, jŭ yap glăi na nao amăng bruă mă; ngă tui tŭ yua amăng bruă mă anai. Khua mir sir ăt rơkâo djop sang bruă kơsem min lăng, rơkâo brơi pơblih glăi, pơhrua nao dơ̆ng hơdôm mơta tơlơi amăng tơlơi phiăn ră anai pơkă kơ hơdră bơtơhmal ba pơdjai mơnuih soh hăng ngă tui pơdjai mơnuih soh laih kơđi phat giong kiăng djơ̆ hăng tơlơi pơhing ră anai, lăi pơthâo hăng anom bruă hơmâo tơlơi dưi sem glăi hăng pơsit.