Tơdơi kơ mông čơkă, Khua mir sir ơi Võ Văn Thưởng hăng Khua mir sir Hàn Quốc lăi pơthâo anăn khua mua pơprong mơng dua bơnai amăng mông čơkă anai. Kiăo tui anun, dua čô khua ba jơlan ƀing khua mua pơprong mơng dua bơnah pơphun mông jơnum bơkơtuai. Lăng yôm tơlơi rô nao rai hăng Việt Nam, kiăo tui Khua mir sir Hàn Quốc rai čuă Việt Nam tal anai hơmâo lu khua mua pơprong anun lĕ: Kơ-iăng khua dêh čar ngă rah Khua ding jum hơdră bruă hăng prăk kak Choo Kyung Ho hăng sa, dua čô khua ding jum, gơnong bruă pơkŏn.

Laih dong hơmâo rơbêh 200 boh anom bơwih ƀong sĭ mơdrô mơng Hàn Quốc. Anai lĕ mrô anom bơwih ƀong sĭ mơdrô lu hloh amăng hơdôm tal nao čuă mơng dêh čar tač rơngiao giăm anai mơng Khua mir sir ơi Yoon Suk Yeol, tơlơi anai brơi ƀuh tơlơi yôm amăng ngă hrŏm bơwih ƀong, tuh pơ alin, sĭ mơdrô mơng dua bơnah. Lăi glăi tơlơi tơña hlâo kơ hrơi rai čuă Việt Nam, Khua mir sir Hàn Quốc Yoon Suk Yeol čang rơmang pơtrut ngă hrŏm hăng Việt Nam amăng djop mơta bruă.