Pri hră pơhing dêh čar tal XVII hơmâo 1.894 tơlơi čih mơ-it nao. Amăng mrô 157 tơlơi čih ba nao pơplông rơnuč, Khul pơphun hơmâo ruah 8 pri A, 24 pri B, 46 pri C, 45 pri pơsur pran jua. Hơdôm tơlơi čih ba nao pơplông kiăo tui hơdôm bruă prong mơng kơđi čar, bơwih ƀong huă, gru grua, mơnuih mơnam, wai pơgang rơnuk rơnua hăng djop mơta bruă amăng tơlơi hơdip mơda, lăi nao rơđah hơdôm tơlơi yôm phăn amăng lŏn ia amăng thun 2022.

Đĭ pơhiăp amăng mông jao pri, Khua mir sir ơi Võ Văn Thưởng đăo gơnang, hră pơhing amra ngă klă bruă jao yôm phun, jing ƀing mơnuih ba jơlan amăng bruă pôr pơhing tơlơi črâo trun-gru grua mơng Ping gah, djơ̆ hăng pran đăo gơnang, čang rơmang mơng Ping gah, Kơnuk kơna hăng mơnuih ƀon sang, kơdrưh ang mơng hră pơhing găn rơgao ƀiă truh 100 thun laih.