Khua mir sir ơi Võ Văn Thưởng bơni hơ-ơč kơ Khua anih jưh hơmâo ngă bruă truh kih amăng hrơi blan dŏ mă bruă ƀơi Việt Nam hăng lu tơlơi gum pơgôp prong amăng bruă pơđĭ kyar tơlơi rô nao rai giăng mah klă hiam hăng pơđĭ tui ngă hrŏm amăng lu bruă dong kơplah wah dua boh dêh čar. Pơtŏng glăi, hrơi blan rơgao, tơlơi rô nao rai sĭ mơdrô dua bơnah pơđĭ kyar kơtang, khă hnun hai Khua mir sir lăi, boh than hơmâo ngă aka ƀu djơ̆ tui hăng tơlơi hơmâo hăng čang rơmang mơng dua boh dêh čar pơtrut tui dong tơlơi ngă hrŏm sĭ mơdrô.

Dua bơnah tañ pơphun Jơnum tal 24 mơng Jơnum min pơlir kơnuk kơna Việt Nam - Bulgaria kơ bruă ngă hrŏm bơwih ƀong huă, sĭ mơdrô hăng boh thâo kĭ thuâ̆t măi mok amăng thun 2023; kiăng dêh čar Bulgaria tañ kĭ brơi Hră kĭ pơkôl pơgang ba tuh pơ alin Việt Nam - EU, ngă gêh gal brơi anom bơwih ƀong hăng anom bruă tuh pơ alin EU, Bulgaria hăng Việt Nam mut nao rai ngă hrŏm hloh dong. Dua bơnah kiăng ngă hrŏm, djru nao rai ƀơi hơdôm mông jơnum bơkơtuai ƀơi jar kmar.