Khua mir sir ơi Võ Văn Thưởng čang rơmang hăng đăo kơnang, mah mă bruă hơgĕt hai, Khua anih jưh pơ ala dêh čar Prang ăt djă pioh tơlơi khăp hiam klă kơ lŏn ia, ană mơnuih Việt Nam, jing pô pơtruh nao rai pơtrut hloh bruă ngă giăng mah gru grua mơ̆ng đưm hiam klă Việt Nam-Prang. Bơni kơ khua anih jưh pơ ala ơi Nicolas Warnery ngă giong bruă jao hiam klă amăng thun blan mă bruă ƀơi Việt Nam, Khua mir sir lăi pơtong, 50 thun rơgao, tơlơi ngă giăng mah Việt Nam-Prang hơmâo ba glăi boh tơhnal yôm biă mă, boh nik ñu amăng 10 thun phrâo akŏ pơjing bruă ngă hrŏm yôm hloh dua bơnah.

Việt Nam hơdor bơni kơ tơlơi djru ba lu mơ̆ng dêh čar Prang brơi hơdôm klăk đing ia jrao vaccine pơhlôm pơgang klin Covid 19. Kiăng pơđĭ tui hloh bruă  rô nao rai dua bơnah pơ anăp anai, Khua mir sir rơkâo dua bơnah ăt pơtrut jĕ giăm, rô nao rai, pơblih čuă jơmư trư găn khua mua pơprong. Kơnang kơ Khua anih jưh pơ ala, Khua mir sir mơ-it hiăp jak iâu hăng lăi pơthâo Việt Nam amra čơkă jum Khua mir sir dêh čar Prang ơi Emmanuel Macron rai čuă jơmư Việt Nam amăng mông gêh găl pơ anăp anai.