VOV4.Jarai-Ăt amăng hơdră nao mă bruă ƀơi An Giang, mơguah lơ 18/1, ƀơi plơi prong Long Xuyên, Khua mir sir ơi Nguyễn Xuân Phúc nao jơnum hrom pơphun brơi bruă mă hơdôm kơčăo bruă tuh pơ alin pơkra jơlan 91 hăng jơlan weh plơi prong Long Xuyên. Anai lĕ ring bruă pơkra jơlan blung a mơ̆ng Ding jum Jơlan glông hăng pơdŭ pơgiăng pơphun pơkra thun 2022.

Kơčăo bruă anai tuh pơ alin čuk jơlan pơtruh nao rai jơlan 91 hăng jơlan weh plơi prong Long Xuyên, yua Khua dêh čar hlăk anun ơi Nguyễn Xuân Phúc kĭ hră tuh pơ alin thun 2017, amăng kơčăo bruă pơtruh nao rai amăng kual ia krông Mekong. Kơčăo bruă anai, tuh pơ alin 2.100 klai prăk, čan prăk mơ̆ng sang bruă prăk pơđĭ kyar kual ASIA ADB sa črăn lĕ rơnoh prăk kơnuk kơna Việt Nam, yua kơ Ding jum Jơlan glông hăng pơdŭ pơgiăng tuh pơ alin. Anai lĕ ring bruă dŏ tơguan amăng 20 thun laih mơ̆ng mơnuih ƀôn sang An Giang.

Khua mir sir ơi Nguyễn Xuân Phúc hok mơak nao jơnum hrom hăng čang rơmang anai lĕ kơčăo bruă akŏ thun 2022 pioh pok prong lu bruă mă tuh pơ alin čuk pơkra jơlan ƀơi lŏn, jơlan rô nao rai amăng ia rơsĭ, ia krông ƀơi An Giang laih anun kual ia krông Cửu Long, kual hơmâo 20 klăk mơnuih ƀôn sang  dŏ gêh găl pơđĭ kyar.

Tŏ tui anun, amăng tlam lơ 18/1, Khua mir sir ơi Nguyễn Xuân Phúc nao pơhmư̆ mông ngă lơphet mă yua Sang măi braih Hạnh Phúc pơdong ƀơi tơring glông Tri Tôn, tơring čar An Giang. Anai lĕ sang măi prong hloh ƀơi kual ASIA, dưi uă braih hơmâo 1.000 tơn/hrơi.

Khua mir sir ơi Nguyễn Xuân Phúc lăi, hăng dêh čar juăt ngă hmua tui hăng ƀing ta, bruă pơtrut pơsur pơkra gơnam jing tơlơi kiăng biă mă đah mơng pơkra gơnam hơmâo nua, pơplih tui tơlơi hơdip mơnuih ƀon sang. Hơ-ơč hmưi kơ Kông ti pơčruh ngă Grup bơwih ƀong Tân Long pơphun mă yua sang măi uă braih Hạnh Phúc, Khua mir sir kiăng Kông ti ƀu kơnong lăng ba gơnam dưi pơhno gơnam ƀơi anih sĭ mơdrô đôč ôh mơ̆ ăt kiăng hluai tui anih pioh braih mơng ƀing gơñu, ngă hrŏm klă hăng mơnuih ngă hmua, ƀu dưi blơi pơjuă pơdai mơng neh met wa ôh.

Nay Jek-Siu H’Mai: Pơblang