VOV4.Jarai-Mơguah lơ 27/1, ƀơi anom bruă khua mir sir, ơi Nguyễn Xuân Phúc Khua mir sir tŭ jum nai prin tha Kusumi Mari, Khua kông ty TNHH pơtô pơjuăt gah bruă ia jrao dêh čar Japan. Ƀơi mông jơnum, Khua mir sir ơi Nguyễn Xuân Phúc bơni biă mă yă Kusumi Mari, Khua kông ty TNHH Pơtô pơjuăt bruă ia jrao dêh čar Japan rai tuh pơ alin ƀơi Việt Nam, hăng kơčăo bruă man pơdong sang hră laih anun sang ia jrao.

Nai prin tha Kusumi Mari bơni kơ Khua mir sir hơmâo pioh mông tŭ jum ñu laih anun lăi pơthâo kơčăo bruă hlăk pok pơhai man pơdong ƀơi Việt Nam. Ñu lăi pơtong, tơlơi gir run man pơdong sang ia jrao tañ giong ƀơi Việt Nam laih anun bă yua boh thâo ia rơgơi măi mok phrâo hloh amăng bruă ia jrao ăt kah hăng hơdră pơjrao phrâo mơ̆ng Japan.

Lăi pơtong bruă ngă hrom phrâo amăng bruă ia jrao rơgơi hloh mơ̆ng dêh čar Japan. Pơsit bruă ngă hrom pơtô pơjuăt hăng jao glăi tơlơi thâo, măi mok phrâo jing sa tơlơi đing nao hlâo hloh ƀơi Việt Nam, Khua mir sir čang rơmang nai prin tha yă Kusumi Mari gir run hloh pơtrut tañ ngă giong kơčăo bruă anai.

Nay Jek: Pơblang