VOV4.Jarai - Mơguah lơ 25/2 tui mông ƀơi dêh čar Singapore, mông čơkă Khua mir sir dêh čar ta ơi Nguyễn Xuân Phúc hăng bơnai ñu laih dong ƀing khua mua pơprong mơng Việt Nam hơmâo pơphun yôm phăn ƀơi Ƀirô Khua mir sir Singapore tui tơlơi git gai mơng Khua mir sir Singapore yă Halimah Yacob hăng rơkơi ñu. Tơdơi kơ mông čơkă, Khua mir sir ơi Nguyễn Xuân Phúc hơmâo mă tơnga hăng Khua mir sir yă Halimah Yacob.

Tui hăng hrơi mông pơkă tơdơi kơ mông bưp Khua mir sir Singapore, Khua mir sir dêh čar ta ơi Nguyễn Xuân Phúc hơmâo nao bưp Khua dêh čar Singapore ơi Lý Hiển Long hăng nao lăng mông pơjao nao rai hră pơ-ar ngă hrŏm kơplah wah hơdôm ding jum, gơnong bruă dua bơnah. Amăng tal nao čuă Singapore mơng Khua mir sir dêh čar ta amra hơkrŭ glăi pran đăo gơnang kơđi čar, ngă dơlăm tui tơlơi rô nao rai ngă hrŏm amăng djop mơta bruă, ba tơlơi rô nao rai dua bơnah Việt Nam - Singapore jai hrơi sit nik, tŭ yua ƀiă dong.  

Siu Đoan: Pơblang