Tŭ jum hăng khua mir sir laih anun Grup mơ̆ng Việt Nam, hơmâo Khua tơring čar Gyeonggi, ơi Kim Dong-yeon hăng khua mua pơtom hiăp, tơring čar Gyeonggi laih anun ƀôn prong Gwangju. Gyeonggi lĕ tơring čar dong tal sa dêh čar Hàn Quốc gah mrô mơnuih lu, dong tal 5 anŏ prong. Tơring čar anai hơmâo 28 boh plơi prong hăng 3 boh tơring glông; plơi prong phun lĕ Suwon.

Biă mă ñu, anai lĕ plơi pla tal dua mơ̆ng 37 rơbâo čô mơnuih ƀôn sang Việt Nam dŏ hơdip mơda; amăng anun 3000 čô mơnuih Việt Nam hăng 500 boh sang anŏ dŏ hrom djă pioh gru grua đưm djuai ania Việt-Hàn amăng ƀôn prong Gwangju. Ƀơi mông mă bruă, Khua mir sir ơi Nguyễn Xuân Phúc rơkâo, khua mua tơring čar Gyeonggi, ƀôn prong Gwangju hăng gong gai kơnuk kơna plơi pla kơtưn pơtrut ƀing ngă bruă sĭ mơdrô mơ̆ng tơring čar anai pok prong tuh pơ alin, sĭ mơdrô hăng lu tơring čar gah Việt Nam, djru kah pơpha tơlơi thâo thăi kơ lu tơring čar Việt Nam ngă tui hơdră git gai wai lăng kơnuk kơna, pơkă anih pơđĭ kyar tuai čuă ngui, lăng ba hăng tŭ jum mơnuih mă bruă apah mơ̆ng Việt Nam; ăt djru ba, đing nao jơlan hơdră hiam klă pioh kơ mơnuih ƀôn sang Việt Nam dŏ pơ tơring čar.

Tlam mơmŏt hrơi anun, Khua mir sir ơi Nguyễn Xuân Phúc hăng grup khua mua mơ̆ng Việt Nam pơpĕ đuăi mơ̆ng tơring čar Gyeonggi, nao pơ tơdron rơdêh por ling tơhan ƀơi plơi prong jưh jom Seoul, đĭ rơdêh por glăi pơ dêh čar ta pô, pơđut tal nao čuă Hàn Quốc hăng tơlơi rơnuk rơnua.