VOV4.Jarai - Mơmot lơ 28/4, ƀơi tơring čar Thừa Thiên Huế, Khul ia jrao kyâo bơrơkal mriah Việt Nam ngă hrŏm hăng Jơnum min mơnuih ƀon sang tơring čar pơphun Blan Khăp pap thun 2022 hăng anăn “Pơlir hơbit mơnuih mơnam - Bang hyu tơlơi thâo pap” hăng ngă lơphet Hrơi ia jrao kyâo b ơrơkal mriah hăng Blan čơƀang mriah jar kmar (8/5). Khua mir sir ơi Nguyễn Xuân Phúc nao pơhmư̆ hăng pơhiăp ƀơi mông jơnum. Blan ngă bruă Khăp pap thun 2022 pơphun mơng lơ 1/5 truh lơ 31/5, abih bang mơnuih amăng khul gir iâu pơthưr arăng pơgôp hơmâo 400 klai prăk djru ba 1 klăk wơ̆t čô mơnuih tơnap tap, amăng anun hơmâo 100.000 anih djru khăp pap. Biă ñu, ƀơi mông pơphun Blan khăp pap thun 2022, Khul ia jrao kyâo bơrơkal mriah Việt Nam pơphun ngă 2 jơlan hơdră yôm phun amăng 5 thun pơ anăp, anun lĕ jơlan hơdră “Rơnuk rơnua kơ mơnuih ƀun rin, tơnap tap” hăng “Gơnam ƀong huă klă kơ ƀing čơđai rin, rơwen rơwô, drơi jăn ƀu hiam”. Pơhiăp ƀơi mông ngă bruă, Khua mir sir ơi Nguyễn Xuân Phúc jak iâu hơdôm anom bruă, anom bơwih ƀong, ƀing juăt djru mơnuih tơnap, hăng abih bang mơnuih ƀon sang djru ba dong, gum hrŏm hăng Khul ia jrao kyâo bơrơkal mriah Việt Nam akŏ pơjing kual mơnuih mơnam thâo gum pơgôp, hơmâo pran khăp ƀu-eng, thâo pap, yua kơ mơnuih mơnam bang hyu tơlơi khăp pap.

Siu H’Mai: Pơblang