VOV4.Jarai - Tlam lơ 11/2, ƀơi Sang bruă Khua mir sir, Khua mir sir ơi Nguyễn Xuân Phúc tŭ jum Khua anih jưh pơ ala dêh čar Mi hăng Khua anih jưh pơ ala dêh čar Mexico pơdah pơƀuh Hră Kơnuk kơna. Tŭ jum Khua anih jưh dêh čar Mi, ơi Marc Evans Knapper pơdah pơƀuh Hră kơnuk kơna mơ-it, Khua mir sir ơi Nguyễn Xuân Phúc bơni hơ-ơč kơ Khua anih jưh hơmâo Khua mir sir Joe Biden jao bruă phrâo hăng hơ-ơč hmưi ñu pot glăi pơ Hà Nội. Khua mir sir lăng yôm biă kơ Khua anih jưh amăng hrơi blan mă bruă ƀơi Sang anih jưh pơ ala dêh čar Mi ƀơi Việt Nam rơwang thun 2004-2007 hơmâo djru pơtrut đĭ tơlơi rô nao rai dua bơnah.

Khua mir sir ơi Nguyễn Xuân Phúc tŭ jum Khua anih jưh pơ ala dêh čar Mi, ơi Marc Evans Knapper.

Khua mir sir đăo gơnang amăng hrơi mông ngă bruă ƀơi Việt Nam, Khua anih jưh amra gir hloh dong, gum pơgôp hloh dong amăng bruă pơtrut tui tơlơi rô nao rai kơplah wah Việt Nam hăng Mi. Tŭ jum Khua anih jưh pơ ala dêh čar Mexico pơdah pơƀuh Hră Kơnuk kơna, Khua mir sir bơni hơ-ơč kơ ơi Alejandro Negrin Munoz hơmâo ruah ngă Khua anih jưh pơ ala brơi dêh čar Mexico ƀơi Việt Nam, laih dong đăo gơnang Khua anih jưh hăng tơlơi apăn bruă mơng ñu amra ngă truh kih djŏp bruă mă, pơđĭ tui tơlơi rô nao rai mơng đưm hlâo hăng ngă hrŏm amăng lu bruă hloh kơplah wah dua boh dêh čar.

Siu H’Mai: Pơblang