VOV4.Jarai-Tlam lơ 16/9, ƀơi sang bruă khua mir sir, ơi Nguyễn Xuân Phúc Khua mir sir hơmâo tŭ jum khul mơnuih rơgơi kơhnâo jar kmar rai jơnum Bơkơtuai jar kmar anăn : “Boh thâo ia rơgơi, pran jua hiam hăng pơđĭ kyar ană mơnuih” pơphun ƀơi tơring čar Bình Định amăng Hơdră “Bưp nao rai Việt Nam” tal 18. Pơ ala kơ kơnuk kơna lŏn ia hăng mơnuih ƀôn sang Việt Nam, Khua mir sir ơi Nguyễn Xuân Phúc hok mơak čơkă jum 51 cô mơnuih rơgơi kơhnâo jar kmar rai jơnum “Boh thâo ia rơgơi, pran jua hiam hăng pơđĭ kyar ană mơnuih”, hơmâo lu ring bruă boh thâo ia rơgơi pơčeh phrâo djru kơ dêh čar hăng rŏng lŏn tơnah.

Khua mir sir ơi Nguyễn Xuân Phúc čơkă ƀing mơnuih rơgơi kơhnâo jar kmar

Laih dơ̆ng, Khua mir sir čih pioh tơlơi gir run mơ̆ng bruă ngă hrom pơphun jơnum bơkơtuai anai tŭ yua Hơdră “Bưp nao rai Việt Nam” hăng Khul pơlir hơbit anom bruă pơ ala mơnuih ƀôn sang rŏng lŏn tơnah, Ding jum Boh thâo ia rơgơi hăng boh thâo phrâo, tơring čar Bình Định, Anom kơsem min pơđĭ kyar dêh čar Prang ƀơi Việt Nam. Jơnum bơkơtuai anai jing bruă ngă yôm biă mă amăng bruă mă mơ̆ng Ding jum Boh thâo ia rơgơi hăng boh thâo phrâo, anăp nao ngă tui Thun jar kmar kơ boh thâo ia rơgơi yua pơđĭ kyar hơđong kjăp yua Sang gum hơbit djop dêh čar pơsit rơnuč thun 2021 hăng UNESCO pôr pơthâo sit nik blan 7/2022.

Nay Jek: Pơblang