Ơi Trần Lưu Quang pơala brơi gong gai kơnuk kơna, mơnuih ƀôn sang ƀôn prong HCM, mơ-it hiăp hning rơngôt hrŏm, juh alum hăng khua sang bruă pơ ala dêh čar Lao ƀơi ƀôn prong HCM, abih bang khua mua, mơnuih mă bruă amăng sang bruă pơ ala dêh čar Lao, kơnuk kơna hăng mơnuih ƀôn sang Lao yua tơlơi rơngiă rơngiom, hning rơngôt kơ khua pơ ala mơnuih ƀôn sang dêh čar Lao ơi Xaysomphone Phomvihane đuăi nao laih.

Amăng hơdrôm hră čih tơlơi hning rơngôt, Khua git gai ping gah ƀôn prong HCM, ơi Trần Lưu Quang čih tui anai: “ Hning rơngôt kơ ơi Xaysomphone Phomvihane, ding kơna ding jum kơđi čar, Khua pơ ala mơnuih ƀôn sang dêh čar Lao, mơnuih ngă gơyut, giăng mah, adơi ayong jĕ giăm biă mă hăng ping gah, kơnuk kơna hăng mơnuih ƀôn sang Việt Nam. Ơi Xaysomphone Phomvihane đuăi nao jing sa tơlơi rơngiă prong mơ̆ng ping gah, kơnuk kơna hăng mơnuih ƀôn sang Lao adơi ayong, tơlơi rongiă prong prin, ƀu hơmâo anŏ hơgĕt dưi pơhrua glăi ôh kơ ping gah, kơnuk kơna hăng mơnuih ƀôn sang Lao adơi ayong, giăng mah, gơyut gơyâo tong ten; Ping gah, gong gai kơnuk kơna hăng mơnuih ƀôn sang ƀôn prong HCM rơngiă sa čô gơyut tong ten, hiam klă, jĕ giăm, pô pioh tơlơi hiam mơak amăng bruă djă pioh hăng pơđĭ tui tơlơi ngă giăng mah yom phara plah wah Việt-Lao, amăng anun tơlơi ngă hrŏm tong ten plah wah ƀôn prong HCM hăng hơdôm tơring čar, ƀôn prong gah dêh čar Lao.