VOV4.Jarai - Ƀrô hrơi hơdor 77 thun Hrơi akŏ pơdong kơnuk kơna lŏn ia Cộng hoà xã hội chủ nghĩa Việt Nam, mơguah lơ 31/8, khul khua pơ ala Ping gah ƀon prong - Jơnum min pơ ala mơnuih ƀon sang - Jơnum min mơnuih ƀon sang - Jơnum min djŏp djuai ania mơnuih mơnam Việt Nam ƀon prong HCM yua Ding kơ apăn bruă Kơđi čar, Khua git gai ƀon prong HCM ơi Nguyễn Văn Nên ngă khua khul hơmâo nao tŭi ñang, dưm bơnga hơ-ŭ kơ Khua mir sir Hồ Chí Minh hăng Khua mir sir Tôn Đức Thắng.

Ơi Nguyễn Văn Nên tŭ ñang hơdor kơ Khua mir sir Hồ Chí Minh

Ƀơi sang djă pioh gru đưm Hồ Chí Minh - pơdong ƀơi ƀon prong Hồ Chí Minh, khua mua hơmâo tŭi ñang, dưm bơnga hơ-ŭ kơ Khua mir sir Hồ Chí Minh, kŭp akŏ hơdor glăi pran jua gum djru prong prin tuh rơyuh mơng Wa Hồ hăng bruă hơkrŭ lŏn ia hing ang mơng Ping gah laih anun djuai ania ta. Giong mơng anun, khul khua hơmâo tŭi ñang, dưm bơnga kơ Khua mir sir Tôn Đức Thắng ƀơi anih hơdor kơ rơgŏm ơi Tôn Đức Thắng. Ƀơi anai, ƀing khua pioh mông kŭp akŏ hơdor kơ khua git gai prong prin mơng khul kông ñơn, sa čô mơnuih ngă gru rơđah bơngač kơ tơlơi pơmin tơpă, hiam, abih pran jua bơwih brơi bruă hơkrŭ, bơwih brơi mơnuih ƀon sang.

Siu H’Mai: Pơblang