VOV4.Jarai - Ƀrô hrơi ngă lơphet hơdor 132 thun hrơi tơkeng Khua mir sir Hồ Chí Minh (19/5/1890 - 19/5/2022) hăng 111 thun Hrơi Wa Hồ nao ĕp jơlan pơklaih rơngai lŏn ia (5/6/1911-5/6/2022), mơguah lơ 18/5, khua mua git gai ƀon prong Hồ Chí Minh yua ơi Nguyễn Văn Nên, Ding kơna ding jum kơđi čar, Khua git gai ping gah ƀon prong Hồ Chí Minh ngă khua ba jơlan nao dưm bơnga, tŭi ñang hơ-ŭ kơ Khua mir sir Hồ Chí Minh. Ƀơi Sang djă pioh gru Hồ Chí Minh - ƀon prong Hồ Chí Minh, khul khua hơmâo dưm bơnga, tŭi ñang hơ-ŭ kơ Khua mir sir Hồ Chí Minh.

Ƀing khua pioh mông kŭp akŏ hơdor kơ tơlơi gum djru prong prin, ai hơtai mơng Khua mir sir Hồ Chí Minh, khua prong git gai Ping gah hăng mơnuih ƀon sang ta, Nai pơtô rơgơi mơbruă hing ang mơng bruă Hơkrŭ Việt Nam, tơhan sông kơtang tlaih rơngai djuai ania, Mơnuih rơgơi hră, boh thâo gru grua rŏng lŏn tơnah, Mơnuih ngă tơhan cộng sản jar kmar rơgơi, ngă gru kiăng arăng hla tui, hơmâo tuh rơyuh pran jua kơ bruă hơkrŭ mơng Ping gah, mơng djuai ania ta.

Siu H’Mai: Pơblang