Amăng hră hơ-ơč hmưi, Khua git gai Ping gah dêh čar Nga pơlir hơbit Dmitry Medvedev pơdah pran jua đăo kơnang, hăng tơlơi găn gao bruă kơđi čar kơpal khop hăng juăt bruă, Khua git gai Ping gah dêh čar, Khua mir sir ơi Tô Lâm amra gum hơgôp ba glăi bôh tơhnal bruă pơđĭ kyar bơwih ƀong – mơnuih mơnam hăng hơdră bruă pơtom hiăp rơngai mơ̆ng Việt Nam; hrŏm hăng anun, đăo kơnang lĕ tơlơi rô nao rai kơplah wah Ping gah Nga hăng Ping gah dêh čar Việt Nam amra hơkrŭ đĭ hloh dong yua kơ bôh tŭ yua mơ̆ng mơnuih ƀôn sang dua bôh dêh čar.

Amăng hră hơ-ơč hmưi, Khua git gai Ping gah Cộng sản dêh čar Japan Shii Kazuo čang rơmang hăng đăo kơnang kơtang hloh dua ping gah amra gum hrŏm dong, pơkĕ hrŏm kơjăp, pơtrut tơlơi gum hrŏm, bơkơtuai, ngă dơlăm dong tơlơi rô nao rai kơplah wah dua ping gah, kơtưn tơlơi rô nao rai kơplah wah dua bôh dêh čar. Ƀrô djơ̆ tal anai, Khua git gai Ping gah Tlaih rơngai mơnuih ƀôn sang dêh čar Sri Lanka, Khua Grŭp pơtom hiăp Ping gah Cộng sản Españôl Manuel Pineda, Khua git gai Ping gah Cộng sản djop djuai ania Españôl Victor Lucas, Khua Grŭp wai lăng bruă rô nao rai hăng jar kơmar Ping gah Pơlir hơbit mơnuih ƀôn sang Mơnuih mơnam dưm kơnar dêh čar Êjip, Khua git gai Ping gah Cộng sản dêh čar Sudan Fathi Alfadl hmâo mơ-ĭt laih hră, điêng hơ-ơč hmưi Khua git gai Ping gah, Khua mir sir dêh čar ta ơi Tô Lâm./.