VOV4.Jarai-Amăng dua hrơi lơ 19 hăng lơ 20/1, Grup hyu mă bruă mơ̆ng Ping gah, Jơnum min pơ ala mơnuih ƀôn sang, jơnum min mơnuih ƀôn sang, jơnum min djop djuai ania mơnuih mơnam Việt Nam tơring čar Kon Tum nao čuă, pơpŭ thun phrâo kơ tơhan pơgang guai dêh čar, pơpŭ thun phrâo ƀong tết kơ khua mua hăng mơnuih ƀôn sang dŏ ƀơi giăm guai dêh čar sô̆ hăng dêh čar Lao.

Khua git gai ping gah tơring čar Kon Tum ơi Dương Văn Trang pơpŭ tết, ƀơk gơnam kơ khua mua ling tơhan pơgang guai dêh čar

Nao čuă tơhan pơgang guai dêh čar ƀơi puih kơđông, khua mua gong gai kơnuk kơna hăng mơnuih ƀôn sang 3 boh să giăm guai dêh čar sô̆ hăng dêh čả Lao kah hăng : Să Đak Blô, Đak Nhoong, tơring glông Đak Glei; să Đak Dục, tơring glông Ngọc Hồi, Khua git gai ping gah, Khua jơnum min pơ ala mơnuih ƀôn sang tơring čar Kon Tum, ơi Dương Văn Trang hrom hăng ding kơna hyu mă bruă, nao tơña bla kơ bruă prăp lui ƀong tết, ƀơk gơnam kơ khua mua, tơhan pơgang guai dêh čar, gong gai kơnuk kơna hăng mơnuih ƀôn sang.

Khua git gai ping gah tơring čar Kon Tum ơi Dương Văn Trang ( pô klum đuăn) čuă, pơpŭ tết, ƀơk gơnam kơ sang anŏ ƀun rin plơi Bung Tôn, să Đak Blô, tơring glông Đak Glei

Grup ăt nao čuă dơ̆ng hơdôm sang anŏ hơmâo djru pran kơ kơnuk kơna hơkrŭ đưm ƀơi să Đak Blô, Đak Nhoong, tơring glông Đak Glei hăng să Đak Dục tơring glông Ngọc Hồi. Ƀrô djơ̆ tal anai, hơmâo hơdôm boh sang bruă sĭ mơdrô nao hrom hyu pơpŭ thun phrâo anai hơmâo jao 600 anung gơnam, sa anung 500 rơbâo prăk brơi kơ mơnuih ƀôn sang 3 boh să giăm guăi dêh čar.

Nay Jek: pơblang