Amăng hrơi mông mơak Blan Bơrơmi ria Trung thu, Khua gum bruă git gai ping gah, ơi Trần Cẩm Tú hrŏm hăng grup khua mua hyu čuă jơmư hăng ƀơk gơnam kơ čơđai muai tơnap tap plơi SOS Hà Nội. Ñu lăi pơtong, kiăng kơ ƀing ană amôn čơđai muai mơak mlam Blan Bơrơmi ria trơi pơđao yâo mơak kah hăng amăng sang anŏ pô, pơtrut pran jua čơđai muai brơi săng, gưt hiăp, hrăm thâo abih bang khom gum hrŏm djru ba klă.

Yă Bùi Thị Minh Hoài, Khua Jơnum min djop djuai ania mơnuih mơnam Việt Nam nao čuă, ƀơk gơnam kơ čơđai muai hlăk dŏ đih pơjrao ƀơi sang ia jrao pơjrao čơđai muai dêh čar. Hyu ĕp lăng, tơña bla, juh alum, pơtrut pran jua ƀing čơđai hơmâo tơlơi ruă hăng sang anŏ ƀing gơñu, yă Bùi Thị Minh Hoài čang rơmang abih bang ƀing čơđai muai duăm ruă tañ suaih, găng añrăng; mơnuih amăng sang anŏ ăt pơgang tơlơi suaih pral kiăng găn rơgao hĭ tơlơi tơnap tap lông lăng, tañ bong glăi hăng tơlơi duăm ruă. Ăt amăng tal anai mơ̆n, Khua anom pơtô bruă ping gah dêh čar, ơi Trịnh Văn Quyết hrŏm grup khua mua hyu mă bruă, nao tơña bla, juh alum ƀing čơđai duăm ruă ƀơi sang ia jrao prong pơjrao ƀing čơđai muai Hà Nội hăng sang ia jrao ling tơhan 103.