VOV4.Jarai-Tlam mơmŏt lơ 13/6, ƀơi sang bruă khua pơ ala mơnuih ƀôn sang dêh čar, khua mua ping gah, kơnuk kơna bưp ƀing pơ ala mơnuih ƀôn sang dêh čar tal XV jing ƀing mơnuih rơgơi kơhnâo kơsem min. Pơhiăp ƀơi mông jơnum, Khua git gai pơ ala mơnuih ƀôn sang dêh čar, ơi Vương Đình Huệ lăi pơtong, thun blan rơgao, ƀing mơnuih rơgơi kơhnâo kơsem min dêh čar ta ngă pô pơ ala mơnuih ƀôn sang dêh čar, hơmâo pơgôp pran jua prong prin amăng bruă pơđĭ kyar kơsem min boh thâo ia rơgơi phrâo, bơwih ƀong huă, mơnuih mơnam, pơgang lŏn ia, dêh čar.

Kơ tơlơi phiăn pơkă, ƀing mơnuih rơgơi kơhnâo ngă pô pơ ala mơnuih ƀôn sang dêh čar ăt ngă hrom anom bruă pơ ala mơnuih ƀôn sang dêh čar pơgôp hrom ƀơ ƀrư̆ ngă giong tơlơi pơtrun, bruă mă, kiăng djơ̆ hăng tơlơi kiăng ngă tui boh thâo ia rơgơi phrâo. Hăng tơlơi đăo kơnang tơlơi pơmin ia rơgơi, pran jua mă bruă mơ̆ng ƀing mơnuih kơhnâo kơhnăk ngă pô pơ ala kơ mơnuih ƀôn sang dêh čar, Khua git gai pơ ala mơnuih ƀôn sang dêh čar čang rơmang lĕ, mah ngă bruă pơpă, ngă khua prong ƀudah anet, hăng tơlơi glăm ba, pran jua mă bruă mơ̆ng pô pơ ala mơnuih ƀôn sang, lu khua mua, mơnuih rơgơi pơsir mă tơlơi tơnap mơ̆ng pô ta, djru pơsir tơlơi tơnap tap hrom mơ̆ng Việt Nam, tơlơi gir run anun amra pơtrut dơ̆ng amăng bruă pơđĭ kyar atur boh thâo ia rơgơi hăng tơlơi kơhnâo kơ dêh čar.

Nay Jek: Pơblang