Amăng hră mơ-it hiăp bơni hơ-ơč, Khua dêh čar Singapore đăo kơnang kơ tơlơi ngă giăng mah tong ten plah wah Singapore hăng Việt Nam amra dưi kơtưn hloh gah yŭ kơ tơlơi git gai mơ̆ng Khua git gai ping gah, Khua mir sir ơi Tô Lâm. Khua čih pioh Ping gah ngă bruă mơnuih ƀôn sang dêh čar Singapore, ơi Lý Hiển Long ăt lăi, dêh čar Singapore amra hrŏm hơbĭt Việt Nam kiăng hneč mă tơlơi gêh găl bơwih ƀong huă hăng bruă mă yôm amăng kual, pok pơhư prong bruă ngă hrŏm hăng ngă dơlăm tui tơlơi rô nao rai mơ̆ng dua bơnah ping gah, pơđĭ tui tơlơi ngă giăng mah dua bơnah dêh čar đĭ nao amăng yak phrâo dơ̆ng.

Khua dêh čar Australia lĕ, bơni hơ-ơč kơ ơi Tô Lâm dưi ruah ngă khua git gai ping gah dêh čar Việt Nam, lăi pơtong, dêh čar Australia hăng Việt Nam lĕ ƀing gơyut gơyâo hơđong kjăp, tơlơi rô nao rai dua bơnah dêh čar kjăp hloh plah wah mơnuih ƀôn sang hăng tơlơi đăo kơnang yôm phara. Ping gah Cộng sản dêh čar Mi ăt lăi, tơlơi thâo dơlăm mơ̆ng Khua git gai ping gah, Khua mir sir ơi Tô Lâm kơ tơlơi pơtrun djơ̆ mơ̆ng jơlan hơdră Mac-Lenin hăng jơlan hơdră mơ̆ng ping gah Cộng sản Việt Nam, hơmâo pơphô brơi tơlơi git gai thâo pơčeh phrâo hăng phara hơjăn anŏ găl mơ̆ng ơi Tô Lâm, amra djru kơ Việt Nam dưi man pơdong jing lŏn ia xã hội chủ nghĩa phrâo rơnuk anai, atur tơlơi bơwih ƀong huă sĭ mơdrô mơnuih mơnam ngă pô bơkơnar, sa boh dêh čar ba akŏ hlâo hăng tơlơi hơdip mơda amra dưi pơđĭ tui.