VOV4.Jarai - Mơguah lơ 27/4, ƀrô ngă lơphet 47 thun Hrơi pơklai rơngai kual Dơnung, pơlir hơbit lŏn ia (30/4/1975-30/4/2022), mơguah lơ 27/4, Grup khua git gai Ping gah dêh čar, Khua mir sir, Khua mua pơ ala mơnuih ƀon sang, Kơnuk kơna, Jơnum min Djŏp djuai ania mơnuih mơnam Việt Nam hrŏm hăng ƀing pơ ala mơng Ding jum, anom bruă ping gah hăng ƀon prong Hà Nội hơmâo dưm bơnga, mut nao pơ pơsat jep Khua mir sir Hồ Chí Minh. Ƀơi anăp drơi jăn bơngăt Khua mir sir Hồ Chí Minh, grup khua pơdah pran jua hơdor bơni, pơpŭ prong biă kơ hơdôm tơlơi gum djru mơng Wa hăng bruă hơkrŭ lŏn ia mơng Ping gah hăng djuai ania ta. Wa tuh rơyuh pran jua, tơlơi hơdip kơ ană plơi pla, kơ lŏn ia ta, ba jơlan Ping gah, mơnuih ƀon sang hơmâo ngă tơlơi dưi prong, hing ang biă mă. Guang bơnga mơng grup khua hơmâo tơlơi čih “Djŏp rơnuk hơdor bơni na nao kơ Khua mir sir Hồ Chí Minh prong prin”. Tŏ tui, grup khua hơmâo nao dưm bơnga, tŭi ñang kơ ƀing tơhan djai pơsăn drơi ƀơi Gong kut tơhan sông kơtang djai pơsă drơi ƀơi jơlan Bắc Sơn.

Siu H’Mai: Pơblang