VOV4.Jarai - Amăng 2 hrơi, hrơi anai (1/6) hăng hrơi pơgi (2/6), khua mua pơ ala mơnuih ƀon sang bơkơtuai ƀơi sang jơnum prong pơtŏng glăi boh than ngă tui akŏ bruă pơđĭ kyar bơwih ƀong huă - mơnuih mơnam hăng prăk kơnuk kơna thun 2021; bruă pơđĭ kyar bơwih ƀong huă - mơnuih mơnam hăng prăk kơnuk kơna hơdôm blan akŏ thun 2022; jơnum klah čun glăi bruă ngă tui Tơlơi pơtrun mrô 42 mơng Ƀirô khua git gai pơ ala mơnuih ƀon sang dêh čar kơ pơsir hĭ hnưh dong ƀu anăm tla mơng hơdôm sang bruă prăk. Ƀơi mông jơnum blung a Khua mua pơ ala mơnuih ƀon sang dêh čar, Kơ-iăng khua dêh čar ơi Lê Văn Thành lăi pơthâo glăi: Kơnuk kơna hơmâo 12 mơta bruă kiăng ngă, amăng anun pơƀut wai pơgang klin Covid-19 hăng rŭ glăi tañ, pơđĭ kyar bơwih ƀong huă mơnuih mơnam hơđong kơjăp. Pok pơhai hơdôm tơlơi pơtrun mơng Jơnum ping gah lok 5 (tal 13), biă ñu lĕ bruă lŏn tơnah, bơwih ƀong hrŏm, ngă hmua, mơnuih ngă hmua, plơi pla; ječ ameč ngă pơgiong, pơdah pơ Khua mua pơ ala pơkra ming Tơlơi phiăn lŏn tơnah thun 2013. Kơnuk kơna ăt pơsit pok pơhai ngă khut khăt pơtrut tui prăk tuh pơ plai; laih dong pơđĭ tui tơlơi apăn bruă mơng sang ia jrao. Pơphun klă tal pơplông abih anuh 12 hăng ruah hrăm gưl prong thun 2022.

Siu H’Mai: Pơblang