VOV4.Jarai-Tlam lơ 22/6, Khua mua pơ ala mơnuih ƀôn sang tơring čar Dak Lak jơnum pơčrông sai sa hnong bruă lok 3, khua mua pơ ala mơnuih ƀôn sang tơring čar tal X, rơwang bruă thun 2021-2026, pơsit lu hră pơtrun yôm pơdjơ̆ nao kơ Hơdră mă bruă rŭ glăi tơlơi bơwih ƀong huă mơnuih mơnam. Ƀơi mông jơnum, khua mua pơčrông sai, tŭ ư hăng pơsit hră pơtrun tuh pơ alin 8 kơčăo bruă mă yua rơnoh prăk mơ̆ng dêh čar gah Hơdră rŭ glăi hăng pơđĭ kyar bơwih ƀong huă mơnuih mơnam hăng hră pơtrun kah hăng: Pơblih glăi jơlan hơdră tuh pơ alin pơđĭ kyar hơdôm plơi prong gưl dua ƀơi Quảng Nam, Hà Tĩnh hăng Dak Lak-kơčăo bruă anet Ƀuôn Ma Thuôt; pơgôp hiăp pơkra glăi kơčăo bruă brơi ming pơkra glăi bơnư̆ kong ia kjăp hơđong.

Pơhiăp git gai jơnum, Y Vinh Tơr, ding kơna aka sit nik ping gah dêh čar, Khua jơnum min pơ ala mơnuih ƀôn sang tơring čar, Khua grup pơ ala mơnuih ƀôn sang dêh čar ƀơi Dak Lak pơtrun hiăp, hăng 8 kơčăo bruă gah Hơdră rŭ glăi hăng pơđĭ kyar bơwih ƀong huă mơnuih mơnam, Jơnum min mơnuih ƀôn sang tơring čar git gai tañ djop gơnong bruă ƀơi tơring čar, tơring glông, pô anom bruă tuh pơ alin prăp lui hlâo akŏ tlôn mă bruă, ngă hră pơar pơdjơ̆ nao kiăng djơ̆ tơlơi phiăn.