VOV4.Jarai-Amăng tal nao čuă jơmư hăng mă bruă ƀơi dêh čar Lao mơ̆ng grup khua mua sang phat kơđi dêh čar Việt Nam, mơ̆ng lơ 9-13/8, Khua sang phat kơđi Việt Nam, ơi Nguyễn Hòa Bình hrom hăng grup nao mă tơngan Khua git gai ping gah, Khua mir sir dêh čar Lao, ơi Thongloun Sisolith hăng Khua git gai pơ ala mơnuih ƀôn sang dêh čar Lao ơi Saysomephone Phomvihane.

Ƀơi mông tŭ jum, Khua sang phat kơđi dêh čar Việt Nam, ơi Nguyễn Hòa Bình lăi pơthâo hăng Khua mir sir Lao, ơi Sisolith boh tơhnal bơkơtuai hăng khua mua sang phat kơđi dêh čar Lao; boh tơhnal jơnum khua mua sang phat kơđi hơdôm boh tơring čar klâo boh dêh čar Lao-Việt Nam-Kur lok 6 hăng lăi pơthâo tơlơi kiăng mơ̆ng klâo boh dêh čar amăng bruă kơtưn ngă hrom gah sang bruă phat kơđi. Khua git gai ping gah, khua mir sir dêh čar Lao, ơi Thongloun Sisolith pơdah pran jua hok mơak hơmâo čơkă khua mua Việt Nam nao čuă dêh čar Lao tal anai;laih dơ̆ng lăi, anom bruă sang phat kơđi Lao hăng Việt Nam kiăng ngă hrom tong ten hloh pioh hmao pơsir hĭ hơdôm  tơlơi phrâo hơmâo, kiăng pơgang anŏ tŭ yua tơlơi dưi kơ mơnuih ƀôn sang ăt kah hăng tơlơi đăo kơnang mơ̆ng mơnuih ƀôn sang hăng gong gai kơnuk kơna, wơ̆t hăng đăo kơnang kơ ping gah, Kơnuk kơna dêh čar.

Nay Jek: Pơblang