Ƀơi sang jơnum prong tơring čar Kon Tum, pơ ala brơi Ping gah tơring čar, Jơnum min pơ ala mơnuih ƀôn sang, Jơnum min mơnuih ƀôn sang tơring čar, Jơnum min djop djuai ania mơnuih mơnam Việt Nam tơring čar Kon Tum, ơi Dương Văn Trang-khua git gai Ping gah tơring čar Kon Tum pơpŭ ƀing ama hăng mơnuih tui đăo khŏp sa bơyan No-el mơ-ak mơ-ai, bă blai bưng hiam. Khua git gai Ping gah tơring čar Kon Tum tŭ yap tơlơi mut hrŏm mơng ƀing kŏm drơi jăn tui đăo hăng mơnuih ƀôn sang amăng hơdôm tal pơplông khăp kơ lŏn ia, hrŏm hăng Ping gah, gong gai ƀôn lan pơjing tơring čar Kon Tum jai hrơi pơđĭ kyar.

Ơi Dương Văn Trang ăt pơlăi nao rai hăng ƀing ama kơ hơdră bruă mơng tơring čar mơng anai truh thun 2025 djru brơi hơdôm boh sang anŏ ƀun rin dưi ruh hĭ 1.600 boh sang tơ̆i rơ̆i, sang dŏ jang jai kiăng neh met wa hơmâo sang dŏ hơđong. Ñu čang rơmang pơ anăp anai, tui tơlơi črâo ba mơng ƀing ama, neh met wa tui đăo khŏp tơring čar Kon Tum tŏ tui hơmâo tơlơi dưi prong, hơdip hiam tui tơlơi đăo, gum tơngan hrŏm pơjing tơring čar Kon Tum jai hrơi hiam klă.