Mơguah kơnôl 21/9, tui hăng mông pơ čar rơngiao, ƀơi ƀôn prong New York, Khua ping gah, Khua mir sir ơi Tô Lâm hrŏm hăng khul khua pơprong mơ̆ng Việt Nam pioh mông bưp Khul rơgơi kơhnâo hăng Čơđai sang hră gưl prong Việt Nam ƀơi čar Mi, hrŏm hăng ƀing rơgơi kơhnâo, mơnuih thâo hră Việt Nam glăk dŏ mă bruă pơ čar Mi. Năng ai 40 čô pơ ala gah bruă pơčeh phrâo ia rơgơi, măi mok, rơdêh por ƀu hơmâo mơnuih mơgăt, pơkra phần mềm, hơdră ngă bruă gah kơnuk kơna, prăk kăk, pơtô hrăm hăng tơlơi phiăn jar kmar nao jơnum hrŏm.

Ƀing kơhnâo ba tơbiă lu bruă kiăng pơđĭ tui tơlơi gơgrong yom mơ̆ng Việt Nam amăng anŏ yom pơkra rai ia rơgơi ană  mơnuih ta pơčeh phrâo ƀơi rŏng lŏn tơnah, pơhưč prăk djru mơ̆ng jar kmar, laih dong pơtruh mơnuih rơgơi mơbruă Việt Nam dŏ pơ čar rơngiao hăng ƀing dŏ amăng dêh čar ta. Pơhiăp ƀơi mông bưp, Khua ping gah, Khua mir sir ơi Tô Lâm bơni biă tơlơi gir run, lăi dlăm kiăng ngă gêh găl brơi kơ ƀing kơhnâo kơhnăk kơsem min boh thâo, pơčeh phrâo ia rơgơi, hăng gum pơgôp kơ lŏn ia ta. Khua ping gah, Khua mir sir lăi, mơnuih Việt Nam dŏ pơ čar rơngiao jing khul ƀu dưi pơčlah đuăi mơ̆ng khul mơnuih djuai ania Việt Nam ôh, laih anun jing khul yom biă mă či đĭ kyar. Hơdôm anom bruă amăng dêh čar kiăng pơhmư̆, jak iâu ƀing kơhnâo rơgơi mơbruă tañ mơtăm amăng bruă čih pơkra hơdră ngă bruă, kơsem min boh thâo hăng pơtô pơjuăt, mơ̆ng anun hơmâo lu tui mơnuih rơgơi Việt Nam glăk dŏ pơ čar rơngiao.