Pơhiăp ƀơi mông mă bruă, Khua ping gah, Khua mir sir ơi Tô Lâm lăi rơđah, hrơi blan rơgao, mah mrô kơđi gah mơnuih ƀôn sang, kơđi tơlơi gah anom bruă kơnuk kơna lu tui mơn, tơnap tui mơn, djŏp gưl ping gah, hăng anom bruă tơlơi phiăn hơmâo lu tơlơi gir biă, ba glăi boh tŭ yua. Khă hnun, kơđi tơlơi dŏ glăi aka ƀu pơsir dŏ lu mơn, kơđi sui thun aka ƀu pơsir đut hlao ôh.

Khua ping gah, Khua mir sir ơi Tô Lâm kiăng pơđĭ tui tơlơi git gai mơ̆ng Ping gah hăng bruă pơgang hlâo, pơsir hĭ bruă bơrơjah, bơrơsua mơ̆ng mơnuih ƀôn sang, bruă hơmâo amăng anom bruă kơnuk kơna laih anun ngă kơđi. Laih dong khŏm čih pơkra giong abih tơlơi phiăn, pơhlom ba tơlơi dưi mơ̆ng mơnuih ƀôn sang hơmâo pơgang ba na nao mơ̆ng pơgang hơmâo tơlơi bơrơsua truh kơ ngă tui hră phat kơđi, lui hĭ hră pơ-ar ƀu kiăng đơi ngă pơkaih hĭ bruă pơsir kơđi. Khua ping gah, Khua mir sir rơkâo hơdôm sang bruă kơnuk kơna ječ ameč ngă tui hơdôm bruă jao bơdjơ̆ nao; bruă rơđah baih lĕ pơsir hlao mơtăm, bruă hơget dŏ gun lĕ pơklaih brơi, anăm pơjao nao rai, anăm tơguan nao rai ƀing gŏp ôh. Rim bruă mă khŏm pơsit rơđah anom bruă ƀơi git gai phun, anom bruă ƀơi thơ gum ngă, anŏ ba glăi, hrơi mông ngă giong./.