Klah čun mông jơnum, Khua ping gah, Khua mir sir ơi Tô Lâm lăng yom pran jua gơgrong ngă bruă mơ̆ng hơdôm anom bruă lơ̆m prăp rơmet čih pơkra hră lăi pơthâo, akŏ bruă yom phun; laih dong kiăng pơhmư̆ tơlơi pơgôp hiăp, čih pơkra pơgiong hĭ hră pơ-ar pơhlom klă hăng djơ̆ hrơi pơkă.

Hăng akŏ bruă čih pơkra tơlơi pơkôl pơkă hơdôm tơlơi pơtrun đĭ kyar bơwih ƀong kơnuk kơna tui Tơlơi pơtrun mrô 79 mơ̆ng Ding jum kơđi čar, Khua ping gah, Khua mir sir kiăng hơmâo tơlơi pơmin djơ̆ hrŏm kơ tơlơi bơwih ƀong kơnuk kơna pơdong kah hăng sa khul hơmâo prăk kăk, ngăn hơdrăp kơnuk kơna, lŏn tơnah, kông ngăn glai klô, sang dŏ, jơlan nao rai, gơnam pioh pơđom mơ̆ng dêh čar, anom bơwih ƀong kơnuk kơna ngă pô hăng hơdôm tơlơi hơmâo pơkŏn dong. Phun ñu pơ anăp lĕ sem lăng abih bang tơlơi phiăn bơdjơ̆ nao, pơsir hĭ tơlơi dŏ kơđông, tơnap tap, pơđĭ tui boh tŭ yua wai lăng anom bơwih ƀong kơnuk kơna ngă pô hăng pơtrut tui tơlơi ba jơlan mơ̆ng anih bơwih ƀong kơnuk kơna ngă pô amăng djŏp bruă bơwih ƀong./.