Pơhiăp klah čun mông jơnum, Khua ping gah, Khua mir sir ơi Tô Lâm, Khua ping gah Khul tơhan tŭ yap, bơni biă kơ hơdôm bruă hơmâo ngă amăng 3 blan tal 3, amăng anun Ping gah khul tơhan dêh čar hơmâo git gai abih bang ling tơhan ngă tui djơ̆ tơlơi git gai, tơlơi pơčrâo trun mơ̆ng Ping gah, Kơnuk kơna, pơtrut tui gru grua hing ang hăng kơnuih “Ling tơhan Wa Hồ”, gum pơgôp, găn rơgao djŏp tơlơi tơnap, pok pơhai ngă tui abih bang hơdôm bruă gah ling tơhan blah ngă, pơgang lŏn ia.

Lăi dlăm, amăng tơđar pơkă 3 blan tal 4, jing hrơi blan yom biă mă, dưi pơsit dưi ngă bruă amăng thun 2026 truh kih hă ƀô̆, Khua ping gah, Khua mir sir rơkâo Ping gah khul ling tơhan pơƀut pơčrâo bruă pok pơhai khut djŏp hơdră ngă bruă, gir ngă giong djŏp hơnong pơkă, bruă jao amăng thun 2026, hăng boh tŭ yua prong hloh. Git gai abih bang ling tơhan mă bruă beč bal, prăp rơmet hlâo, đăo lăng hlâo, pơtŏng djơ̆ djŏp bruă či hơmâo, ngă klă bruă lăi pơthâo, pơphô jơlan gah ngă bruă hăng Ping gah, Kơnuk kơna, hăng hơdră pơsir hơdeč hmar, dưi găn rơgao djŏp bruă, djŏp tơlơi truh tơdah hơmâo, anăm brơi sư̆ rơbư̆, wi wư, biă ñu hơdôm jơlan gah akŏ phun, bruă ƀơi guai dêh čar, bul pơtâo plao ia rơsĭ, plang internet./.