Ƀơi mông jơnum, ƀing khua mua nao pơhmư̆ hơmâo hmư̆ hră lăi pơthâo klah čun boh tơhnal dưi ngă amăng 9 blan laih rơgao; anăp či ngă bruă, bruă mă phun 3 blan či rơnuč thun 2026 amăng ping gah kông an dêh čar hăng lu hơdră lăi pơthâo  sa hnơ̆ng tong ten pơkŏn….

Pơhiăp git gai mông jơnum, Khua ping gah, Khua mir sir ơi Tô Lâm lăi pơtong, mơ̆ng akŏ thun truh ră anai, boh nik ñu amăng klâo blan tal III, tơhan kông an dêh čar ăt pơtong rơđah tơlơi gơgrong ba, ba jơlan hlâo ngă tui jơlan hơdră ping gah, tơlơi phiăn kơnuk kơna dêh čar pơkă, djop hră pơtrun yom mơ̆ng ping gah. Amăng anun lăi pơthâo čih pơkra 2 pok hră pơtrun mơ̆ng Khul apăn bruă ping gah dêh čar, kơ bruă mă pơgang rơnuk rơnua dêh čar  hăng akŏ pơdong bruă mă djơ̆ tơlơi phiăn, rơnuk rơnua, thâo rơgơi, mơak klă, pơđĭ kyar. Kơ bruă mă phun mơ̆ng ră anai truh abih thun, Khua ping gah, khua mir sir ơi Tô Lâm pơtrun hiăp tơhan kông an mơnuih ƀôn sang ăt pơtum ngă pơrơđah hloh djop tơlơi, ngă tui djơ̆ tơlơi kiăng “Pơgang rơnuk rơnua prăp hlâo”, ngă tui hluh gah djop mơta bruă jao kơ tơhan kông an či ngă.