Nao jơnum hrŏm hơmâo Khua git gai ping gah ơi Tô Lâm; khua dêh čar ơi Phạm Minh Chính; khua git gai pơ ala mơnuih ƀôn sang dêh čar ơi Trần Thanh Mẫn; lu khua mua amăng kơnuk kơna, khua hơđăp ping gah, kơnuk kơna hăng rơbêh 3000 čô khua mua pơ ala mơ̆ng 34 boh tơring čar, ƀôn prong, ƀing khua mua sang bruă mơdrô amăng dêh čar hăng tuai jak iâu mơ̆ng dêh čar tač rơngiao nao pơhmư̆.

Pơhiăp pok pơhai jơnum, Khua dêh čar ơi Phạm Minh Chính đăo kơnang, gah yŭ kơ tơlơi git gai mơ̆ng ping gah Cộng sản Việt Nam hing ang, kiăo tui gru grua 80 thun man pơdong, wai pơgang hăng pơđĭ kyar lon ia, abih amăng glông bruă kơđi čar, djop gưl anom bruă kơnuk kơna, djop tơring čar, ƀôn prong hăng abih bang mơnuih ƀôn sang ta ăt ngă tui tơlơi gum pơgôp pran jua, gum tơngan hrŏm, gir run kiăng ngă tui djơ̆ tŭ yua 2 tơhnal pơkă phun 100 thun mơ̆ Ping gah hơmâo pơphô.

Ƀơi mông jơnum, Khua git gai ping gah ơi Tô Lâm, Khua dêh čar ơi Phạm Minh Chính hăng ƀing khua mua amăng ping gah, kơnuk kơna hơmâo ngă tui hơdră gư̆ boh nut pok pơhai tal pơdă prưng gơnam gru grua “80 thun jơlan nao mơ̆ng Rơngai-mơai pô-hyuk hyak” čơkă mơak hơdor glăi 80 thun hrơi akŏ pơdong kơnuk kơna lŏn ia Cộng hòa xã hội chủ nghĩa Việt Nam.

Tal pơdă prưng gơnam anai pok bah amăng mơ̆ng 9 mông mơguah truh 10 mông mlam rim hrơi, na nao mơ̆ng lơ 29/8 truh abih lơ 5/9.