Črâo pơƀuh bơnga hoa giấy glăk čuh bơnga hiam biă mă rôk dua bơnah jơlan plơi Buôr, să Hòa Xuân, plơi prong Buôn Ma Thuột, yă H’Lép Niê, arăng juăt iâu ñu Amĭ Khiết brơi thâo, hơmâo jơlan bơnga anai, yua kơ hơmâo khua ping gah plơi, khua plơi Ama Tháp mơn:

“Ƀơi ƀuôn Buôr, să Hòa Xuân anai, amăng mông jơnum plơi pla, khua plơi lăi pơthâo hăng mơnuih ƀôn sang, djŏp pô djŏp sang anŏ pơhrup brơi jơlan hiam, pla bơnga pla rok, yua hnun ană plơi hok mơ-ak biă. Kâo ăt jing sa čô mơnuih ƀôn sang mơn, hmư̆ khua plơi lăi tui anun kâo ngă tui, pla bơnga hiam mơn”.

Ƀu kơnong iâu pơthưr neh met wa pla bơnga ngă hiam amăng plơi đôč ôh, khua plơi Ama Tháp ăt nao hlâo pơplih phun pla, ñu pla tiu, sầu riêng amăng đang kơphê. Tơdơi kơ hơbô̆ bruă anai tŭ yua, khua plơi Ama Tháp iâu pơthưr mơnuih ƀôn sang mă yua boh thâo kĭ thuâ̆t amăng bruă tơjŭ pla, rông hlô hăng pơphun ngă lu hơbô̆ bruă pơđĭ kyar bơwih ƀong. Ñu lăng ba, čuă jơmư, tơña bla hơdôm boh sang anŏ rin, sang anŏ hơmâo anăn kơnuk kơna djru, sang anŏ drit druai tơnap tap...mơ̆ng anun hơmâo hơdră djru sit nik kiăng ƀing anai hơmâo tơlơi hơdip hơđong. Ayong Y Sol Niê Buôn Dap, dŏ ƀơi ƀuôn Buôr lăi:

“Amăng plơi anai Ama Tháp ngă khua plơi, djru ba mơnuih ƀôn sang ngă hră pơ-ar, pơtô brơi ană plơi ngă hmua, ngă hră ƀơi sang să, djru ană plơi pơđĭ kyar bơwih ƀong, djru pơđĭ tui tơlơi hơdip mơda mơnuih ƀôn sang pơ anai”.

Hơdor glăi hrơi mông hơmâo gong gai să hăng neh met wa plơi Buôr ruah ngă kơ-iăng khua plơi, truh kơ khua plơi, ayong Ama Tháp lăi, amăng thun 2011, amăng plơi hơmâo arăng nao plư, jak iâu kiăng ană plơi kiăo tui ƀing gơñu ngă bruă soh sat, sit Ama Tháp ăt kơtuă mơn, bral mơn. Tơdơi kơ thâo rơđah ƀơi djơ̆, ƀơi glăi, Ama Tháp hrŏm hăng gong gai să nao pơ rim boh sang anŏ, pơblang brơi kiăng mơnuih ƀôn sang thâo rơđah. Yua mă bruă gir tui anun yơh jing Ama Tháp hơmâo gong gai să hăng neh met wa amăng plơi kơnang kơ ñu, ruah ñu ngă kơ-iăng khua, tơdơi kơ anun ngă khua plơi, laih dong ngă khua ping gah amăng plơi. Gơgrong bruă prong tui anun, Ama Tháp pơtă glăi pô ñu khŏm gir hloh dong, amra ba jơlan ngă gru hiam hloh dong kiăng djơ̆ hăng tơlơi kơnang mơ̆ng mơnuih ƀôn sang:

“Kâo lăi kiăng neh met wa lăng kâo anai, anăm hmư̆ tui, anăm ƀong ia bah arăng plư pleč, pơčut pơčao ôh, gong gai ta lăng abih bang dưm kơnar soh yơh, djuai ania ta kar hăng djuai ania pơkŏn mơn. Ƀing ta khŏm pơmin kơ tơlơi hơdip ta pô ƀơ̆i hlâo, hơdip dơnap, sang hơmâo, hmua hơmâo, bơwih ƀong đĭ, asơi huă añăm ƀong huăi kơƀah. Neh met wa ăt ƀuh mơn, ră anai kơnuk kơna djru pơkra dơnao kŏng ia brơi ƀing ta hơmâo ia ngă hmua, pơkra jơlan hiam, kơnuk kơna ta ƀu pơtlaih lui pô hlơi drơi pă ôh, anun ană plơi khŏm đăo kơnang yơh”.

Lăi nao tơlơi gơgrong bruă mơ̆ng khua ping gah, khua plơi ƀuôn Buôr Ama Tháp, ơi Nguyễn Đức Nhuận, khua ping gah să Hòa Xuân lăi:

“Ama Tháp ñu dŏ mơdrah, mă bruă hur har, hơdeč hmar mơn, thâo pơčeh phrâo, laih dong abih pran jua hăng mơnuih ƀôn sang, ñu hơmâo lu tơlơi pơplih phrâo hloh amăng bruă man pơdong plơi pla phrâo. Plơi Buôr hlâo adih ăt jing plơi yôm phun mơn, ră anai hlăk ai rim thun nao ngă tơhan, mrô mơnuih nao ngă tơhan rơgao hơnong pơkă, bruă mă amăng plơi lĕ ñu ăt gir ngă abih pran mơn”.

Mơ̆ng hơdôm tơlơi gum pơgôp mơ̆ng Ama Tháp, kơ-iăng khua ping gah, khua plơi Buôr hrơi blan rơgao ƀu kơnong djru pơplih tơlơi hơdip ană plơi đôč ôh, ăt ngă kơjăp tui pran jua đăo gơnang mơ̆ng neh met wa hăng Ping gah, Kơnuk kơna; jing mơnuih arăng kơnang, pơtruh nao rai ping gah, gong gai să hăng mơnuih ƀôn sang amăng bruă akŏ pơdong anom bruă kơđi čar, djru pơđĭ kyar bơwih ƀong huă - mơnuih mơnam ƀơi să.