VOV4.Jarai - Mơguah lơ 6/6, Tal jơnum lok 3, Khua pơ ala mơnuih ƀôn sang dêh čar ta tal 15 bơkơtuai ƀơi grŭp kơ Hơdră pơtrun tuh pơplai 3 rơwang bruă pơkra jơlan đuăi hmar  Châu Đốc - Cần Thơ - Sóc Trăng (tal sa); Khánh Hòa - Buôn Ma Thuột (tal 1); Biên Hòa -Vũng Tàu (tal 1) hăng Hơdră pơtrun tuh pơplai Rơwang bruă jơlan kơtuai guai mrô 4 plơi prong jưh jom Hà Nội hăng rơwang bruă kơtuai guai mrô 3 ƀôn prong Hồ Chí Minh. Lu khua pơ ala pơdah pran jua tŭ ư hrom hăng hơdră pơtrun tuh pơplai 5 rơwang bruă jơlan nao rai kiăng pơđĭ kyar bơwih ƀong – mơnuih mơnam, pơđĭ kyar jơlan nao rai ha amăng plĕ, pơtlaih tơlơi gun ƀơi jơlan pơgiăng gơnam tam, plai ƀiă tơlơi truh ƀơi jơlan nao rai. Khă hnun hai ƀing khua pơ ala ăt gum pơhiăp rơđah mơn, rơkâo Kơnuk kơna ngă rơđah sa dua bôh yôm amăng hơdră pơtrun tuh pơplai ăt kah hăng hơdôm jơlan gah ngă tui rơwang bruă. Hăng 3 rơwang bruă jơlan nao rai Châu Đốc - Cần Thơ - Sóc Trăng; Khánh Hòa - Buôn Ma Thuột; Biên Hòa -Vũng Tàu sa dua čô khua pơ ala pơdah pran jua bơngot yua kơ bơdjơ̆ nao lu lŏn dlai, amăng anun kơnong kơ rơwang bruă jơlan đuăi hmar Khánh Hòa – Buôn Ma Thuột khom pơplih lŏn dlai đĭ truh rơbêh kơ 219 rơbâo ektar./.

Siu H’ Prăk: Pơblang