VOV4.Jarai - Mơguah anai (14/6), Khua pơ ala mơnuih ƀôn sang dêh čar ta bơkơtuai ƀơi sang rông kơ rơwang bruă Tơlơi phiăn ngă tui tơpă ƀơi anom bruă, plơi pla. Hlâo kơ mông bơkơtuai, lu tơlơi gum pơhiăp tŭ ư tơlơi kiăng hloh mă yua Tơlơi phiăn, yua kơ tơlơi tơpă lĕ jơlan gah kiăng mơnuih ƀôn sang ngă tui tơlơi dưi pô, pơdah pran run đĭ, tơlơi čang rơmang, bôh tŭ yua hăng tơlơi dưi pô, gum hrom amăng hơdôm bruă mă mơng Kơnuk kơna hăng mơnuih mơnam. Samơ̆ rơkâo khom pơkă rơđah hơdôm hơdră pơdah tơlơi pơhing, bruă gơgrong mơng mơnuih apăn akô̆ amăng ngă tui Tơlơi phiăn tơpă ƀơi anom bruă, plơi pla. Hlâo kơ anun, bruă bơkơtuai ƀơi grŭp kơ rơwang bruă Tơlơi phiăn ngă tui tơlơi tơpă ƀơi anom bruă, lu khua pơ ala mơnuih ƀôn sang rơkâo đĭ khom pel ĕp glăi hơdôm hơdră lăi pơdah tơlơi pơhing, ăt kah hăng tơlơi pơkă bruă gơgrong mơng mơnuih apăn akô̆ amăng ngă tui Tơlơi phiăn tơpă ƀơi anom bruă, plơi pla. Să, phường, tơring kual lĕ gưl ƀơi anăp pok pơhai, ba hơdôm hơdră pơtrun hơdră bruă amăng tơlơi hơdip mơda hăng anai ăt lĕ gưl giăm mơnuih ƀôn sang hloh. Yua anun, lăi pơdah, rơđah amăng ngă tui tơlơi tơpă ƀơi plơi pla anom bruă khom kơsem min tŏng ten, pơhlôm jơlan gah “mơnuih ƀôn sang thâo, mơnuih ƀôn sang črông lô, mơnuih ƀôn sang ngă, mơnuih ƀôn sang pel ĕp, mơnuih ƀôn sang lăng tui, mơnuih ƀôn sang čơkă mă”./.

Siu H’ Prăk: Pơblang