Mơguah lơ 13/2, pơgôp hiăp kơ Tơlơi phiăn Pơphun kơnuk kơna čih pơhrua phrâo, ơi Trần Thanh Mẫn, Khua git gai pơ ala mơnuih ƀôn sang dêh čar lăi, tơlơi kiăng biă mă pơpha gưl apăn bruă kơ Kơnuk kơna kiăng kơnuk kơna dêh čar prăp lui hlâo pơsit bruă mă tui hăng tơlơi hơmâo sit nik jing kah hăng gai treh pơkă tơpă hơnơ̆ng pơsir hơdôm anŏ gun, kơđông hĭ bruă pơđĭ kyar. Khua git gai pơ ala mơnuih ƀôn sang dêh čar ơi Trần Thanh Mẫn lăi pơtong, hơdôm tơlơi hơmâo ĕp lăng laih tong ten khom pơsir mơtam. Biă mă ñu, ƀu yua tơguan tui rơnoh pơkă, hơdră brơi ngă hră pơar khăng khŏp mơ̆ ngă kaih hĭ bruă pơđĭ kyar lŏn ia.

Khua git gai pơ ala mơnuih ƀôn sang dêh čar lăi lĕ, lơ̆m pơgôp hiăp čih pơkra glăi tơlơi phiăn khom ĕp lăng tong ten, kiăng pơhlôm brơi djơ̆ lăp hăng tơlơi pơtrun mơ̆ng Phiah phiăn. Hăng tơlơi phiăn pơphun bruă mă gong gai kơnuk kơna djop tơring čar čih pơkra glăi kiăng pơpha lăp hloh, jao tơlơi dưi kơ khua mua gong gai kơnuk kơna pơsit mă, pơphun mă bruă, glăm ba bruă gơñu hơmâo ngă. Tui hăng anun, bruă prăp lui hlâo beč bal hloh. Bruă čih pơkra glăi pơhrua phrâo tơlơi phiăn pơphun bruă kơnuk kơna dêh čar pơpha tơlơi dưi lu hloh kơ  djop tơring čar, khua pơ ala mơnuih ƀôn sang kơtưn bruă sem lăng amăng djop bruă mă.