Jơlan hơdră anai dưi pơphun jơnum ƀơi anăp hăng pơkĕ internet pơtruh hăng 102 boh să pơhmư̆ online amăng đơ đam tơring čar. Khua mua tơring čar Dak Lak hơmâo gư̆ boh nut pơphun kơčăo bruă akŏ pơdong atur ba yua boh thâo ia rơgơi mrô Dak Lak mơ̆ng thun 2021-2025, anăp nao truh thun 2030-ring bruă phun yom hloh pioh čơkă jơnum ruah khua ping gah tơring čar rơwang bruă thun 2025-2030. Tơring čar pơphun “100 hrơi kơtang hloh” mơ̆ng lơ 15/5 truh lơ 25/10/2025 bruă ngă abih bang mơnuih ƀôn sang hrăm bruă boh thâo ia rơgơi mrô, khut khăt kiăng pơlar tơlơi thâo, hơdră ba yua ia rơgơi mrô amăng tơlơi pơhing hăng pơblih yua mrô truh pơ djop plơi pla, khul grup mơnuih ƀôn sang, ƀôn ƀut amăng plơi pla.

Bruă ngă anăp nao pơtô brơi kơ abih bang mơnuih ƀôn sang, boh nik ñu mơnuih ƀôn sang kual ataih, plơi pla mơnuih djuai ƀiă, kiăng abih bang thâo mă yua mrô, thâo gư̆ kơtit măi telephôn rơgơi ĕp mă tơlơi pơhing sang anŏ, anăn păn ta pô amăng sang bruă kơnuk kơna dŏ djă pioh, bơwih brơi bruă sĭ mơdrô, ngă hră pơar đah mơ̆ng huăi gun gan, tơnap tap. Ăt amăng mông jơnum anai mơ̆n, lu khua mua brơi lông ba yua atur ia rơgơi AI djru ta ĕp mă, lăng tơlơi pơhing pơpha bruă mă djop gưl, kiăng thâo anih či ngă brơi hră pơar amăng sang bruă kơnuk kơna.