Amăng hrơi mông čơkă mơ-ak hrơi ngă hơkrŭ blan 8 hăng akŏ pơjing kơnuk kơna lơ 2/9, mơguah (20/8), ƀơi Sang jơnum dêh čar, mông ngă lơphet hơdor glăi 80 thun hrơi akŏ pơjing Kơnuk kơna (28/8/1945-28/8/2025) hơmâo pơphun yôm phăn. Hơdor glăi gru grua hing ang, Khua dêh čar ơi Phạm Minh Chính lăi rơđah: Lơ 28/8/1945, Kơnuk kơna dêh čar Việt Nam Dân chủ Cộng hòa hơmâo tơlơi lăi pơthâo ƀơi anăo abih bang mơnuih ƀôn sang kah hăng rŏng lŏn tơnah kơ bruă akŏ pơjing Kơnuk kơna phrâo hăng lăi pơthâo anăn apăn 15 čô ding kơna yua Khua mir sir Hồ Chí Minh ngă Khua, kơđŏm glăi hrơi akŏ pơjing Kơnuk kơna ngă hơkrŭ blung a amăng gru grua hơdôm rơbâo thun akŏ pơjing hăng wai pơgang lŏn ia.

Amăng 80 thun, găn rơgao lu thun blan tơnap tap, glêh glar hăng lu tơlơi lông, samơ̆ tui tơlơi git gai mơng Ping gah, Kơnuk kơna amăng djop rơwang hơmâo pơdah tong ten pran jua gir run prong hloh, ngă bruă khut khăt, hrŏm hăng mơnuih ƀôn sang, ling tơhan amăng đơ đam dêh čar ba glăi tơlơi dưi prong prin, yôm phăn amăng djop mơta bruă. Sit biă ñu, Kơnuk kơna đing nao ngă tui khut khăt, tŭ yua tơlơi črâo trun dưm dăp anih anom bruă mă hơbot, mă bruă klă hloh, tŭ yua hăng pơjing hơbô̆ bruă gong gai 2 gưl hăng pơđĭ kyar djop mơta amăng lŏn ia. Đĭ pơhiăp git gai mông ngă lơphet, Khua git gai Ping gah dêh čar ơi Tô Lâm rơkâo hăng čang rơmang ƀing khua mua tŏ tui gum hrŏm hăng Kơnuk kơna kjăp pran ba lŏn ia ta anăp nao rơnuk pơplih phrâo-rơnuk hrưn đĭ kiăng pơđĭ kyar kơtang, hiam klă, pơdrong sah mơng djuai ania.