Tơdơi kơ sa thun bơkơtuai nao rai hăng hơdôm bơnah, truh blan 8 thun anai, Kông ty tơlơi dưi pơkă hơnơ̆ng pơkra ming-sĭ mơdrô-bơwih bơwăng Việt Thắng, să Ea Kar, tơring čar Dak Lak hơmâo ba sĭ mơdrô truh kih rơnoh gơnam 25 rơbâo per jep kơsu, pioh čut amăng sang, ba sĭ pơ dêh čar Mi.

Tui anun, tơdơi kơ hơdôm thun pơhno nao rai gơnam sĭ mơdrô dưi tŭ yua sit nik hăng jep kơsu dêh čar Khač pơkra ming, dêh čar Philippines hăng hơdôm dêh čar amăng kual Dơnung ngŏ ASIA, lu sang bruă mơdrô yua mơnuih ƀôn sang ngă pô ƀơi tơring glông, să tơring čar Dak Lak hlâo adih, dưi ba nao sĭ mơdrô pơ ataih ha mơkrah guang lŏn tơnah, găn rơgao hĭ tơlơi lông lăng phrâo.

Yă Nguyễn Thị Dung, Khua kông ty brơi thâo, kiăng dưi pơhno truh kih pơ anih sĭ mơdrô prong mrô sa rŏng lŏn tơnah kah hăng dêh čar Mi anun, rơngiao kơ tơlơi thâo ba yua ia rơgơi măi mok phrâo, bruă git gai wai lăng, sang bruă mơdrô gơñu ăt khom prăp lui djop prăk kăk tuh pơ alin, kiăng pơhlom bruă pơkra ming djơ̆ hrơi blan pơkă, jao gơnam mơdrô phrâo tui hră pơkôl. Jing tuai juăt čan prăk hmư̆ hing laih amăng 20 thun rơgao mơ̆ng djop sang bruă prăk ƀơi să, yă Dung đăo kơnang lĕ, kông ty Việt Thắng gơñu, amra djop prăk kăk tuh pơ alin či mă bruă.

“Lơ̆m ƀing tuai rơkâo kĭ hră pơkôl blơi lu gơnam ta, kông ty Việt Thắng gơmơi khom pok pơhư prong tui sang măi pơkra ming hăng tuh pơ alin blơi măi pơkra ming phrâo, jua kơtang hloh kiăng kĭ hăng bơnah či blơi. Bưng mơ̆n hơmâo sang bruă prăk Agribank tơring čar Dak Lak ngă hrŏm djru ba, gêh găl brơi gơmơi čan prăk sui thun ƀrô tuh pơ alin blơi măi mok hăng pơdong sang măi. Sang bruă prăk brơi čan ngă amuñ brơi hră pơar tañ, hmar hăng pơhrui hnưh ăt huăi tơnap lơi”.

Hăng kông ty sa ding kơna sĭ mơdrô bơwih bơwăng Thế Kỷ, să Dray Bhăng, tơring čar Dak Lak, bruă ngă hrŏm pơphun bruă mă čem rông hlô mơnong truh pơ bruă akŏ pơjing sa boh sang bruă sĭ mơdrô hăng dêh čar tač rơngiao, ăt brơi ƀuh bruă ngă yom hăng kiăng biă prăk čan laih anun ngă gêh găl kơ bruă mă lơ̆m ba yua prăk čan bơwih ƀong. Yă Lê Thị Tuyết Sương, Khua kông ty kah pơpha, anŏ gêh găl mơ̆ng sang bruă mơdrô lĕ dưi ba yua djơ̆ atur bruă čem rông hlô mơnong, ngă gêh găl brơi čan prăk amuñ hloh, tơdơi kơ anun pơblih yua prăk tuh pơ alin pơkra ming gơnam sĭ mơdrô pơ tač rơngiao.

“Rơnoh prăk gơmơi glăk čan lĕ 3 klai. Hnang blung kâo mă tui čăl, pioh tuh pơ alin pơdong war, sang krư̆ hlô mơnong rông, blơi pơjeh djuai, blơi hlŏk čem. Tơdơi kơ sĭ hơmâo prăk tla djop laih, mơ̆ng bruă rông mơnŭ anun dua rơkơi bơnai gơmơi khin tuh pơ alin sĭ mơdrô gah rơngiao".

Hăng anih gêh găl phara yua hơmâo lŏn mơnai ngă hmua pla pơjing hiam, atur klă, djru prong biă mă kơ djop sang bruă mơdrô, sang anŏ mơnuih ƀôn sang ngă bruă mơdrô ƀơi Dak Lak, pơphun bruă sĭ mơdrô bơwih ƀong huă mơ̆ng ngă hmua, ƀudah tuh pơ alin kơ bruă ngă hmua hrŏm hăng bruă sĭ mơdrô phun. Yua kơ anun, rơnoh prăk tuh pơ alin kơ bruă ngă hmua hơmâo tơlơi gơgrong yom biă mă djru pơtrut tơlơi bơwih ƀong huă mơnuih ƀôn sang ngă khua pô anom bruă mơdrô, tui hăng Hră pơtrun mrô 68 mơ̆ng Ding jum kơđi čar. Laih anun kiăng dưi ngă tơlơi gơgrong anai, rơngiao kơ anom bruă pơdong ƀơi Dak Lak, anih brơi čan prăk mơ̆ng sang bruă prăk ngă hrŏm hăng djop khul grup mơnuih tơpuôl, akŏ pơjing lu grup pơphun brơi čan prăk truh pơ plơi pla, ƀôn ƀut, Yă H’Ley Sia Êban, mơnuih apăn bruă khul đah kơmơi să Dray Bhăng, tơring čar Dak Lak brơi thâo, kơnang kơ djop khul grup amăng să, plơi pla, pơphun grup brơi čan prăk djru kơ mơnuih ƀôn sang tŭ yua biă mă.

“Kơnang kơ bruă akŏ pơjing khul grup brơi čan prăk, ƀing ding kơna amăng grup ăt kah hăng mơnuih ƀôn sang hơmâo dưi čan prăk amuñ hloh, pơsir hĭ anŏ kiăng mơ̆ng gơñu. Hloh kơ anun dơ̆ng, sang bruă gah đang hmua Agribank ăt pok pơhư prong rơnoh prăk brơi čan, kiăng dưi djop brơi sang anŏ mơnuih ƀôn sang ngă bruă sĭ mơdrô dưi čan prăk. Lơ̆m prăk čan dưi truh pơ mơnuih ƀôn sang, lu mơnuih h’ĭn yơh pran jua pơtrut tơlơi bơwih ƀong huă sĭ mơdrô, pơđĭ kyar bơwih ƀong huă amăng sang anŏ”.

Tui hăng ơi Lê Văn Thịnh, Khua sang bruă Agribank tơring čar Dak Lak, lơ̆m tơring čar Dak Lak hơmâo čư̆ siăng wơ̆t ia rơsĭ, bruă sĭ mơdrô boh troh đang hmua mơ̆ng tơring čar jai amuñ hăng gêh găl hloh, sang bruă prăk hơmâo pơblih tui hơdră ngă hră pơar kiăng hmao kru brơi ngă tui anŏ gêh găl anai.

“Pơ anăp anai, ƀing gơmơi hơmâo dăp akŏ bruă rơđah rơđong hloh hăng hơmâo bruă jĕ giăm mơnuih ƀôn sang lu hloh, pơtum nao ƀing čan prăk pơdjơ̆ nao sĭ mơdrô gơnam đang hmua, ba nao pơ dêh čar tač rơngiao. Anun lĕ, sa amăng hơdôm bruă mă phun mơ̆ng Dak Lak. Ră anai, dưi tŭ mă hăng ƀuăn laih hăng hlăk pơphun pơblih bruă ngă hră pơar tui hăng akŏ klôn. Him lăng amăng thun 2025 anai, amra pơđĭ kyar tui, khut khăt ngă tui lu hloh akŏ bruă mơ̆ng Ding jum prăk kăk jao”.

Ƀu kơnong brơi čan prăk ôh, lu sang bruă prăk ƀơi Dak Lak hlăk ngă hăng hơmâo ngă laih, gum hrŏm tŭ yua hrŏm lu sang bruă mơdrô hăng mơnuih ƀôn sang. Mơ̆ng lu pok hră kĭ pơkôl sĭ mơdrô boh troh đang hmua nao pơ tač rơngiao, lu hơbô̆ bruă sang anŏ bơwih ƀong huă amăng plơi pla hơmâo ngă laih mơ̆n, abih bang djru hrŏm ngă kơjăp rơnoh pơđĭ kyar bơwih ƀong huă kơ tơring čar, pơđĭ tui tơlơi hơdip mơda mơnuih ƀôn sang hăng lăi pơtong tơlơi gơgrong ba jing tơmeh phun bơwih ƀong huă, ƀing ngă bruă mơdrô yua mơnuih ƀôn sang pô sang bruă.