Anai lĕ bruă jơnum blung a hăng ăt lĕ jơnum pơphô hlâo mơ̆ng Lâm Đồng, dưi tô nao rai ƀơi anăp truh 123 bôh anih tô nao rai ƀơi să, phường, kual phun amăng tơring čar. Ping gah să Đơn Dương dưi pơdŏng hluai tui tơlơi pơmut hrŏm ping gah hơdôm bôh să Đạ Ròn, Tu Tra hăng tơring kual Thạnh Mỹ hăng abih bang giăm truh 1.200 čô mơnuih ping gah.

Jơnum hmâo bơkơtuai hăng pơsit jơlan gah, tơhnal ba tơbiă, bruă jao, jơlan pơsir phun rơwang bruă pơ̆ anăp, pơsit pran pơdŏng să Đơn Dương pơđĭ kyar pơhlôm abih bang, kơjăp phik. Tơhnal pơkă ngă brơi prăk pơhrui glăi hơnong ñu lơm sa akô̆ mơnuih truh rơnuč rơwang bruă hmâo giăm truh 100 klăk prăk sa thun; sang anô̆ ƀun rin dô̆ yŭ kơ 0,2%.

Pơhiăp amăng mông jơnum, Kơ-iăng Khua dêh čar ơi Nguyễn Hòa Bình pơtŏng sit, hơdră pơtrun lui gưl tơring glông, pơmut hrŏm gưl să lăi hrŏm hơdră pơsit prong, hmâo tơhnal khom ngă mơ̆ng Ping gah dêh čar. Đơn Dương glăk dŏng ƀơi anăp sa pok phun phrâo, sa bưng bôt phrâo. Kơ-iăng Khua dêh čar pơmin, Ping gah, gong gai hăng Mơnuih ƀôn sang djop djuai ania să Đơn Dương amra ngă tui truh kih Tơlơi pơtrun pơsit Jơnum, pơjing Đơn Dương jing sa gru rơđah plơi pla phrâo ngă gru ƀơi tơring čar Lâm Đồng./.