VOV4.Jarai - Mơguah lơ 9/2, Khua git gai pơ ala mơnuih ƀon sang dêh čar ơi Vương Đình Huệ nao čuă, pơpŭ thun phrâo hăng pel ĕp sa, dua bruă anun lĕ lăng glăi bruă mă amăng thun 2021, pok pơhai bruă amăng thun 2022, bruă pơphun ngă tui tơlơi črâo trun mrô 11 mơng Khul čih pioh kơ bruă pơphun čơkă thun Nhâm Dần thun 2022 ƀơi ƀôn prong Hải Phòng. Pơ ala khua mua Ping gah, Kơnuk kơna, Khua pơ ala mơnuih ƀon sang dêh čar, Jơnum min apăn bruă Khua pơ ala mơnuih ƀon sang dêh čar, ơi Vương Đình Huệ tŭ yap, pơpŭ hăng lăng yôm hơdôm boh than dưi ngă mơng Ping gah, gong gai hăng mơnuih ƀon sang ƀôn prong Hải Phòng amăng thun laih rơgao.

Lăi pơtong hơdôm hơdră bruă, bruă jao amăng thun 2022 ƀơi ƀôn prong Hải Phòng amăng djop mơta, ơi Vương Đình Huệ rơkâo, tŏ ngă tui hơdôm boh than dưi ngă amăng thun 2021, thun 2022, Hải Phòng kiăng tŏ tui git gai ngă tui klă hloh tơlơi pơtrun, tơlơi črâo trun mơng Gơnong glông, tơlơi pơsit mơng Ping gah, mơng Khua pơ ala mơnuih ƀon sang dêh čar , Kơnuk kơna kơ hơnong pơkă pơđĭ kyar bơwih ƀong huă - mơnuih mơnam amăng thun 2022 hăng pran jua ječ ameč, khut khăt tơdơi kơ hơdôm hrơi pơdơi ƀong tết mơtăm.  

Siu Đoan: Pơblang