Ƀơi mông tŭ jum, Khua pơ ala mơnuih ƀon sang dêh čar ơi Trần Thanh Mẫn pơsit, tal čuă jơmư anai yom biă mă, ngă dlăm tui tơlơi rô nao rai giăng mah, gum pơgôp yom pơphăn, ngă hrŏm abih bang, pơlir hơbit hơdră ngă bruă akŏ phun plah wah Việt Nam hăng Lao. Ơi Trần Thanh Mẫn lăi, hrŏm hăng tơlơi đĭ kyar hiam klă mơ̆ng dua boh dêh čar, bruă ngă hrŏm plah wah Ƀirô khua pơ ala mơnuih ƀon sang jai hrơi kjăp tui, hơmâo pơphun re se, tŭ yua.

Dua čô khua čang rơmang, Khua mua pơ ala mơnuih ƀon sang Việt Nam hăng Khua mua pơ ala mơnuih ƀon sang dêh čar Lao ăt pơčrông sai, lăi pơthâo hơdôm tơlơi thâo rơgơi, tơlơi răng kơđiăng amăng bruă čih pơkra tơlơi phiăn, laih anun krăo lăng kjăp hloh; ba tơlơi rô nao rai ngă hrŏm plah wah dua sang bruă čih tơlơi phiăn mơ̆ng dua boh dêh čar jai hrơi tŭ yua hloh, gum pơgôp dlăm hloh amăng jơlan hơdră đĭ kyar hrŏm mơ̆ng dua Ping gah, dua Kơnuk kơna./.