Tlam hrơi tơjuh, amai H’Theo hăng ană dra ñu lĕ H’Giang nao ngui đă boh lông. H’Theo 35 thun, jing pô thun tha hloh, bơ H’Giang, 16 thun - jing pô anet hloh amăng grup đah boh lông đah kơmơi Đăk Đoa, Gia Lai.

Amai H’Theo nao đă boh lông 7 thun anai laih, mơ̆ng ană dra ñu H’Giang glăk hrăm anih 4. Hơdôm wơ̆t kiăo tui amĭ ñu nao ngui đă boh lông, dŏ ƀơi guai dŏ lăng, pah tơngan amăng mông pơplông ƀơi să, ƀơi tơring glông, giong anun nao pơplông pơ ataih hloh, anun yơh jing H’Giang hor mơn kơ bruă đă boh lông. Mơ̆ng blung kiăo tui lăng amĭ ñu đă, jing ñu pơtŏp mơn, mut amăng grup đă boh lông đah mơ̆ng dưi mut amăng grup đă boh lông rơguăt. Hăng amai H’Theo, tơlơi hok mơak prong hloh anun lĕ lăng ană dra ñu khin ruah mă bruă ñu hor ngă:“Hlâo adih, arăng lăi đah kơmơi ƀu hơmâo pran jua, tơkai tơngan ƀu kjăp ôh. Samơ̆ ră anai, kơnar soh yơh, đah rơkơi, đah kơmơi hrơi kơnar soh yơh kâo lăng. Ƀing đah rơkơi ñu thâo đă boh lông, anŏ hơget đah kơmơi ta ƀu thâo. Tơnap lu mơn, yua dah ta ngă amĭ yơh, mă bruă hai ta mơn. Samơ̆ yua hor jing khŏm ngă yơh, thun tha baih, dŏ tơguan hơget dong. Kâo djă ba ană kâo kiăng ñu dưi hrăm bruă đă boh lông rơguăt tui hăng ñu hor”.

Tơdah H’Theo prăp rơmet bruă amăng sang anŏ, ngă bruă pơ hmua giong kah mơ̆ng hơmâo wan đă boh lông, jing Rơ Chăm H’Vưn - mơnuih djuai ania Jarai (Pleiku Roh, phường Diên Hồng) tơnap mơn, lơ̆m anur sang anŏ kiăng brơi ngui đă boh lông. Hơdôm hrơi blung a, pô dra tơkeng thun 2009 anai juăt đă hăng ƀing đah rơkơi amăng plơi, yua hui đôč hơmâo ƀing đah kơmơi đă hrŏm.

Bơ ră anai, lơ̆m hơmâo grup đă boh lông, dưi hrăm rơguăt bruă, jing thun H’Vưn hrăm anih 12 mơn, hơmâo sang anŏ pơsur mơ̆ng tlôn:“Mông anai kâo ƀu hơmâo wan đơi dong tah: mơguah nao hrăm, tlam đă boh lông, mơmot hrăm hră dong mơn prăp či pơplông abih anih 12. Kâo khŏm prăp rơmet hrơi mông či nao hrăm đă boh lông. Kâo nao đă ngui boh lông hnăng blung ama kâo ƀu brơi ôh. Samơ̆ anŏ ta hor baih, hlơi mơ̆ng anăm pơgăn. Blung a kâo đă pơ tơdron lŏn đôč, ƀu hơmâo prăk či đă pơ tơdron rok ôh. Tơdơi kơ glăi mơ̆ng pơplông mă pri blung a jing ama kâo brơi laih kâo ngui”.

Tơlơi ră ruai mơ̆ng H’Theo hăng H’Vưn ăt jing ba bơnah amăng bruă pơtŏp hrăm mơ̆ng grup đă boh lông Đăk Đoa, tơring čar Gia Lai. Ƀing đă boh lông djuai ania Bahnar, Jarai rai mơ̆ng lu plơi pla, hnưr thun phara, tơlơi hơdip phara mơn: đa dŏ hrăm hră, đa ngă hmua, đa hơmâo ană, hơmâo rơkơi laih, laih anun ngă bruă hyu ĕp prăk kăk čem rông sang anŏ dong. Gơñu pơbưp yua hor kơ boh lông, arăng juăt pia ơi pơtao mơ̆ng tơlơi bơkjăp drơi jăn. Kiăng dưi nao pơtŏp, gơñu prăp rơmet giong bruă amăng sang, bruă pơ hmua; lu mơnuih kơnang kơ rơkơi, amĭ ama djru ba. Pran jua gir kơtir mơ̆ng rim bơyan pơplông mă pri jing ngă brơi sang anŏ huăi bơngơ̆t đơi dong tah, kơnang kơ bruă ană bă gơñu hor.

Ƀơi Pri đă boh lông đah kơmơi djuai ania ƀiă Việt Nam tal sa thun 2026, grup Đăk Đoa hơmâo 10 čô djuai ania Bahnar hăng 4 čô djuai ania Jarai. Ƀing gơñu mut nao pơplông tal rơnuč bưp grup Lục Yên tơring čar Lào Cai, laih anun mă Pri Dua Á quân. Grup đah boh lông ba glăi tơlơi pơ-ư pơ-ang kơ sit pô gơñu, wơ̆t hăng mơnuih kiăo tui lăng mơ̆ng plơi pla. Ơi Nguyễn Hữu Tường, ƀut plơi 5, să Đăk Đoa, Gia Lai, lăi:“Ƀing đă boh lông mơ̆ng grup Đăk Đoa hur har pran jua mơtăm lah. Mah ƀing adơi hơmâo hmua pơdai lu mơn, samơ̆ ăt gir prăp rơmet či mut amăng grup. Kâo lăng ƀing ñu hor djơ anun, jing ta mơak yua mơn. Ƀing ñu hơmâo mă pri gưl dêh čar, jing hok mơak biă kơ ƀing adơi đeh anai”.

Pô kiăo tui čung ba grup đah boh lông giăm 7 thun rơgao lĕ nai pơtŏp Nguyễn Anh Dũng, hơmâo ƀing adơi amai iâu hơ-on lĕ “Ama Dũng”. Akŏ thun 2019, ñu iâu pơthưr ƀing đah kơmơi hor đă boh lông, pơjing grup đă boh lông Link Coffee. Mơ̆ng pri pơplông pơ Dap Kơdư, Tong Krah, grup mă Pri Dua sa pri Futsal ƀơi ƀon prong Hồ Chí Minh thun 2022. Truh thun 2026, ƀing adơi amai Đăk Đoa hơmâo mă pri Sa ƀơi kual Dap Kơdư, giong anun mă Pri Dua grup đah kơmơi djuai ania ƀiă Việt Nam.

Tơdơi kơ lu thun nai hăng ƀing čơđai prăp rơmet, ĕp mă prăk kăk či pơjing grup đah boh lông, grup đă boh lông đah kơmơi Đăk Đoa sit nik hơmâo jao glăi kơ Grup đă boh lông Hòang Anh Gia Lai. Mơ̆ng anai, ƀing adơi amai hơmâo djru anih pơtŏp hrăm klă, hơmâo prăk blan hăng prăk apah bơni, djơ̆ hăng tơlơi hor. Pô pơtô đă boh lông Nguyễn Anh Dũng đăo kơnang, anai jing gru kơđŏm dưi kiăo tui bruă đă boh lông rơguăt.

“Ƀing adơi ayong gơmơi rơkâo hăng Grup đă boh lông Hoàng Anh Gia Lai lĕ mơguah ăt mă bruă mơn, nao pơ hmua, rơmet set sang anŏ. Tlam lĕ pơƀut pơ tơdron đă boh lông Đăk Đoa hlao. Anai jing gêh găl kơ ƀing adơi amai dưi prăp rơmet bruă sang anŏ laih anun dưi mơn ngă bruă gơñu hor. Grup đă boh lông tŭ ư djơ anun laih. Ƀing gơñu hok mơak biă yua hơmâo mut amăng grup, dưi pơtŏp rơguăt hloh, hơmâo tơlơi hrăm phrâo đah mơ̆ng dưi pơplông mă Pri Dêh čar thun 2027 pơ anăp”.

Tơdơi kơ mông pơtŏp, ƀing adơi amai Đăk Đoa glăi pơ sang, prăp kơ sa hrơi nao hrăm, mă bruă, hyu pơ hmua. Samơ̆ mông hrăm pơ anăp dong, gơñu amra nao pơ tơdron kiăng dưi mut amăn grup Đă boh lông đah kơmơi mă pri dêh čar thun 2027./.