VOV4.Jarai-Ăt amăng hơdră jơnum lok 3, khua mua pơ ala mơnuih ƀôn sang dêh čar tal 15; mơguah lơ 3/6, pơčrông sai ƀơi sang jơnum prong kơ Hră pơtrun brơi lông ngă tui lăng pơphun bruă mă, pơtô bruă mă, anăp brơi bruă mă kơ ƀing mơnă gah rơngiao sang mơnă, ƀing khua mua pơ ala lăi lĕ Hră pơtrun anai jing hơdră yôm biă mă djru kơ ƀing mơnă dưi hrăm bruă hơđong, amuñ dưi ĕp bruă mă tơdơi kơ abih thun dŏ amăng sang mơnă, pioh kơ jơlan pơwơ̆t glăi pơ sang anŏ tañ hloh, djru ba ƀing tom jrôk jơlan laih amuñ hơmâo tơlơi gêh găl pơkra glăi tơlơi hơdip klă hiam kơ pô ta.

Ƀing khua mua rơkâo kơnuk kơna pơkă tong ten, jơlan hơdră ruah mă djru kơ ƀing mơnă pơdah thâo anih mă bruă, anăp bruă mă, pơtô bruă mă kơ mơnă gah rơngiao sang mơnă kiăng pơsir bruă mă hmar hloh hăng djơ̆ hăng tơlơi gêh găl ƀơi sang mơnă. Tlam lơ 3/6, ƀing khua mua pơ ala bơkơtuai amăng grup kơ hơdôm tơlơi phiăn čih pơkra pơblih glăi pơhrua nao dơ̆ng hơdôm mơta tơlơi phiăn Luật Tần số vô tuyến, mrô pơtui jua pơhiăp rajio hăng kơčăo bruă tơlơi phiăn Bruă Ia jâo čih pơkra glăi.

Nay Jek: Pơblang