VOV4.Jarai - Lơ 25/5, tal jơnum lok 3, Khua pơ ala mơnuih ƀôn sang dêh čar ta tal 15 tô̆ tui dong bruă jơnum hăng lu bôh yôm phăn. Mơguah Khua pơ ala mơnuih ƀôn sang bơkơtuai ƀơi grŭp kơ Pơsit pơhrua nao dong bôh tơhnal ngă tui kơčăo bruă pơđĭ kyar bơwih ƀong - mơnuih mơnam hăng ngăn drăp kơnuk kơna thun 2021; tơlơi ngă tui kơčăo bruă pơđĭ kyar bơwih ƀong - mơnuih mơnam hăng ngăn drăp kơnuk kơna hơdôm blan akô̆ thun 2022; Pơsit ngăn drăp kơnuk kơna mă yua thun 2020; Bruă ngă tui pơkrem, pơgăn prai prăk khưi khai thun 2021; Bruă klah čun ngă tui Tơlơi pơtrun pơsit mrô 42 mơng Khua pơ ala mơnuih ƀôn sang kơ pơphô hlâo pơsir hnưh dŏng mơng hơdôm sang prăk hăng bruă pơhrư̆i hrơi mă yua abih ba tơlơi pơkă mơng Tơlơi pơtrun pơsit mrô 42. Mông čơtlăm, Khua pơ ala mơnuih ƀôn sang dêh čar ta hmư̆ hră lăi pơthâo, lăi pơthâo glăi pel ĕp rơwang bruă Tơlơi phiăn pel ĕp, pơjrao tơlơi ruă (pơplih pơkra); Hmư̆ tơlơi lăi pơthâo glăi, tŭ mă, pơplih pơkra hră čih Tơlơi phiăn ngă phim (pơplih pơkra) hăng Bơkơtuai ƀơi sang rông kơ sa dua bôh yôm dô̆ hmâo tơlơi gum pơhiăp pha ra mơng rơwang bruă Tơlơi phiăn ngă phim (pơplih pơkra)./.

Siu H’ Prăk: Pơblang