VOV4.Jarai - Tŏ tui mông mă bruă amăng jơnum lok 3, hrơi anai (9/6), Khua pơ ala mơnuih ƀon sang dêh čar pioh mông tơña hăng lăi glăi. Mơguah hrơi anai, Khua Sang bruă prăk Kơnuk kơna Việt Nam Nguyễn Thị Hồng tŏ tui lăi glăi tơlơi tơña mơng Khua pơ ala mơnuih ƀon sang. Kiăo tui dong lĕ, Khua ding jum wai lăng jơlan glông Nguyễn Văn Thể hăng Kơ-iăng Khua dêh čar ơi Phạm Bình Minh lăi glăi tơlơi tơña mơng Khua pơ ala mơnuih ƀon sang. Hơdôm boh tơhnal phun hơmâo Khua ding jum Nguyễn Văn Thể ngă rơđah amăng mông lăi glăi tơlơi tơña hrơi anai anun lĕ: hrơi mông pơphun, bruă mă amăng pơgăn ngă khưi khai lơ̆m pok pơhai man pơkra hơdôm  ară jơlan glông phun amăng dêh čar ta, bruă man pơkra jơlan rơdêh đuăi hmar. Bruă pel ĕp, krăo lăng, pơhlôm brơi kjăp hơdôm ară jơlan tuh pơ alin man pơkra mơng ngă drăp kơnuk kơna. Tơlơi tơnap hăng hơdră pơsir bruă aka ƀu klă amăng tuh pơ alin, mă yua hơdôm ară jơlan tui hơdră BOT. Amăng mông lăi glăi tơlơi tơña, ƀing Khua pơ ala mơnuih ƀon sang, ƀing rơgơi kơhnâo hăng mơnuih ƀon sang čang rơmang hơdôm hơdră pơplih phrâo mơ̆ Khua ding jum wai lăng jơlan glông lăi nao amra pơtrut tañ bruă man pơkra jơlan phun amăng dêh čar.

Siu Đoan: Pơblang