VOV4.Jarai - Čơtlăm lơ 11/1, ƀơi mông pơđut jơnum ƀu hmâo pơkă hlâo tal sa, Khua pơ ala mơnuih ƀôn sang dêh čar ta tal 15, ƀing khua pơ ala Khua git gai wai lăng pơ ala mơnuih ƀôn sang dêh čar ta hmâo pơphun pơsit pel ĕp Tơlơi pơtrun pơsit pơphô hlâo sa dua hơdră pơkă, hơdră bruă pha ra pơđĭ kyar ƀôn prong Cần Thơ hăng 92,79 čô khua pơ ala tŭ ư, Tơlơi pơtrun pơsit hmâo ngă tui mơng lơ 1/3/2022 hăng dưi ngă tui amăng 5 thun. Tơlơi pơtrun pơsit dưi pel ĕp amra pơtlaih anô̆ gun kiăng Cần Thơ ngă tui hơdôm tơhnal gal, ngă pơhư̆č hơdôm ngăn rơnoh kiăng tuh pơplai hơdôm bruă hmâo anô̆ gal hloh kiăng pơđĭ kyar tañ, kơjăp, tañ jing ƀôn prong phun kual lŏn dăo ia krông Cửu Long hăng lu anô̆ gal pioh pơđĭ kyar bruă đang hmua, măi mok, tuai čuă ngui, tô nao rai jơlan glông sĭ mơdrô hăng gum hrom jar kơmar. Bruă Khua pơ ala mơnuih ƀôn sang dêh čar pel ĕp Tơlơi pơtrun pơsit pơphô hlâo sa dua hơdră pơkă, hơdră bruă pha ra pơđĭ kyar ƀôn prong Cần Thơ amra jing pran rŭ đĭ kiăng Cần Thơ đĭ tui rơnoh pơplih phrâo pơ̆ anăp anai./.

Siu H’ Prăk: Pơblang