VOV4.Jarai - Čơtlăm lơ 7/6, Khua pơ ala mơnuih ƀôn sang dêh čar ta pơphun mông jơnum tơña blung a amăng 2 hrơi ha mơkrah pơphun tơña hăng lăi glăi tơlơi tơña. Khua Ding jum đang hmua hăng pơđĭ kyar ƀôn lan dêh čar ta ơi Lê Minh Hoan lĕ pô blung a lăi glăi tơlơi tơña ƀơi anăp Khua pơ ala mơnuih ƀôn sang. Pơhiăp pok phun mông jơnum tơña hăng lăi glăi tơña, Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, bruă tơña amăng Tal jơnum anai dưi pơphun tui hơdră mă ƀut tơlơi ngă phun, tơlơi gah pô hơpă gơgrong, pô anun hmâo bruă lăi glăi. 4 ƀut tơlơi tơña gah bruă wai lăng kơnuk kơna mơng hơdôm Ding: Prăk kak, Đang hmua hăng pơđĭ kyar ƀôn lan dêh čar ta, Jơlan nao rai dŭ pơgiăng, Sang prăk Kơnuk kơna Việt Nam ƀơi tal jơnum anai. Gah tơlơi đang hmua, bruă jơnum Khua pơ ala mơnuih ƀôn sang hang tơngia hloh hăng hơdôm tơlơi tơña kơ “tơlơi lok nao rao, djơ̆ bơyan rơngiă nua” hăng bruă pơtlaih gơnam mă mơng đang hmua akă truh mông pơđut ôh; tơlơi nua kơmok pruai, ia jrao pơgang phun pla, gơnam ƀong kơ hlô rông, djop mơta gơnam mă yua kơ đang hmua đĭ nua. Lăi glăi ƀing khua pơ ala mơnuih ƀôn sang, hơdôm jơlan gah pơsir Khua ding jum Lê Minh Hoan lăi rơđah, anun lĕ bruă pơphun glăi bruă bơwih ƀong huă, pơsur neh wa mut hrom Anom mă bruă hrom. Hrom hăng anun lăi rơđah truh tơlơi pơmin pơplih mơng bruă ngă đang hmua hơdai nao pơmin bơwih ƀong gah đang hmua.

Lơ̆m hmư̆ tơlơi tơlơi pơhiăp mơng Khua ding jum ngă hmua hăng pơđĭ kyar ƀon lan Lê Minh Hoan, ơi Nay Hứ (66 thun, mơnuih ƀon sang phường Tây Sơn, plơi prong Pleiku, tơring čar Gia Lai) ăt đing nao biă mă hơdră bruă Khua ding jum ba tơbiă kiăng pơsir hĭ bruă nua kmơk, ia jrao pơgang phun pla đĭ tui ră anai. Ơi Nay Hứ čang rơmang, tơdơi kơ tal jơnum anai, Ding jum ngă hmua hăng pơđĭ kyar ƀon lan kiăng hơmâo hơdră bruă tong ten, lăp djơ̆ hăng ƀon lan, kual lŏn lơ̆m pơsir hĭ hơdôm bruă bơdjơ̆ nao pơđĭ kyar ngă đang hmua:

“Čang rơmang tơdơi kơ mông jơnum anai, Khua ding jum hơmâo akŏ bruă tong ten, git gai, črâo ba rơđah rơđông rĭm kual brơi kơ lăp djơ̆ hloh. Pơhmutu kual Dap kơdư, anai lĕ kual ngă hmua prong hloh, ngă hiưm pă git gai črâo ba amăng bruă ngă hmua ƀơi kual Dap kơdư brơi djơ̆, ba glăi tŭ yua ƀiă dong”.

Hrơi anai, Khua ding jum ngă hmua hăng pơđĭ kyar ƀon lan Lê Minh Hoan tŏ tui lăi glăi tơlơi tơña ƀơi anăp Khua pơ ala mơnuih ƀon sang dêh čar. Kiăo tui anun dong lĕ mông tơña hăng lăi glăi mơng Khua ding jum prăk kak Hồ Đức Phớc hăng Khua Sang bruă prăk Kơnuk kơna Việt Nam Nguyễn Thị Hồng.

Siu H’ Prăk – Siu Đoan: Pơblang