VOV4.Jarai - Mơguah lơ 23/5, ƀơi Sang mă bruă Khua pơ ala mơnuih ƀôn sang dêh čar, găh yŭ tơlơi git gai mơng Khua git gai wai lăng pơ ala mơnuih ƀôn sang dêh čar ta ơi Vương Đình Huệ, Khua pơ ala mơnuih ƀôn sang pok phun laih Tal jơnum lok 3, Khua pơ ala mơnuih ƀôn sang dêh čar ta tal 15. Hlâo kơ mông jơnum pok phun, Khua mir sir dêh čar ơi Nguyễn Xuân Phúc, Khua dêh čar ơi Phạm Minh Chính, Khua git gai wai lăng pơ ala mơnuih ƀôn sang dêh čar ta ơi Vương Đình Huệ hăng ƀing khua pơ ala mơnuih ƀôn sang dêh čar ta hmâo dưm guang bơnga, mut čuă pơsat jep Khua mir sir Hồ Chí Minh.

Pok phun tal jơnum lok 3, Khua pơ ala mơnuih ƀôn sang dêh čar tal 15

Amăng tal jơnum anai, Khua pơ ala mơnuih ƀôn sang amra pel ĕp, pơsit Hơdră pơtrun tuh pơplai 5 Rơwang bruă jơlan nao rai yôm phăn lĕ Jơlan guai 4 kual plơi prong jưh jom Hà Nội; Jơlan guai 3 ƀôn prong Hồ Chí Minh; Jơlan đuăi hmar Biên Hoà – Vũng Tàu; Jơlan đuăi hmar Khánh Hòa – Buôn Ma Thuột; Jơlan đuăi hmar Châu Đốc – Cần Thơ – Sóc Trăng. Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi rơđah, ƀing khua pơ ala mơnuih ƀôn sang đing nao gum pơhiăp kơ tơlơi kiăng hloh, ječ hloh mơng hơdôm rơwang bruă; pơpha ta tuh pơplai, tơhnal tŭ ư hrom, ha amăng plĕ hăng glông kual pơkă mơng lŏn ia, kual plơi pla hmâo rơwang bruă găn nao kiăng pơhlôm dưi ngă tui gah ngăn drăp hăng amăng pơphun pok pơhai rơwang bruă, hơkrŭ pơsir tơlơi pơsit tuh pơplai tañ samơ̆ lom pok pơhai kaih, ngă sui, ngă rơngiă đôč ngăn drăp, ƀu tum pơƀut, ngă raih daih ngăn drăp./.

Siu H’ Prăk: Pơblang